Republika e Kosovës po përfaqësohet me krenari në ngjarjen botërore Expo Osaka 2025, që po mbahet në Kansai, Japoni. Përmes një bashkëpunimi të ngushtë ndërinstitucional dhe angazhimit të Qeverisë së Kosovës, vendi po prezantohet për herë të dytë në këtë ekspozitë prestigjioze globale.
Liza Gashi, udhëheqëse e Komisionit Ndërshtetëror për këtë projekt, shprehu entuziazmin për përfshirjen e Kosovës në Expo, duke theksuar rëndësinë e këtij pjesëmarrjeje për prezantimin e kulturës, trashëgimisë, si dhe potencialit ekonomik dhe zhvillimor të vendit.
“Pavijoni i Kosovës në Osaka është konceptuar si një hapësirë mikpritëse, ku vizitorët nga Japonia dhe nga mbarë bota do të kenë mundësi të njohin nga afër Kosovën,” u shpreh Gashi. “Ky është një moment i veçantë për të ndërtuar një imazh të denjë të vendit tonë në atë pjesë të botës.”
Mundesh me e lexu edhe…
Në kuadër të ekspozitës, më 11 qershor do të shënohet Dita Kombëtare e Kosovës, ku do të marrin pjesë Presidentja e Republikës, znj. Vjosa Osmani-Sadriu, si dhe Filharmonia dhe Baleti i Kosovës, përmes një programi të pasur artistik dhe kulturor që do të prezantojë vlerat më të mira të identitetit kosovar.
Liza Gashi falënderoi ekipin ndërinstitucional të Expo-s, komisionerin z. Arbër Mehmeti, si dhe Ambasadën e Kosovës në Japoni, të udhëhequr nga ambasadori z. Sabri Kiçmari, për përkushtimin dhe punën profesionale që bënë të mundur përfaqësimin dinjitoz të Kosovës në këtë platformë ndërkombëtare.
Expo Osaka 2025 paraqet një mundësi të artë për Kosovën për të forcuar lidhjet ndërkombëtare dhe për të promovuar potencialin e saj në një skenë globale./Katror.info
