Ministria e Industrisë, Ndërmarrësisë dhe Tregtisë (MINT) ka mbajtur një takim me bizneset për të prezantuar përfitimet nga Marrëveshja e Tregtisë së Lirë ndërmjet Kosovës dhe Asociacionit Evropian për Tregti të Lirë (EFTA), shkruan Katror.info.
Ministrja Rozeta Hajdari deklaroi se Kosova ka një ekonomi në rritje dhe po bëhet gjithnjë e më tërheqëse për investitorët e huaj. Ajo theksoi se marrëveshja me EFTA-n do të kontribuojë në forcimin e bashkëpunimit ndërmjet bizneseve kosovare dhe atyre ndërkombëtare.
“Kjo është një arritje e rëndësishme për ekonominë e vendit tonë, duke konfirmuar synimin për rritje dhe integrim ekonomik. Negociatat për këtë marrëveshje kanë përfshirë kapituj kyç si tregtia me mallra dhe shërbime, konkurrenca, tregtia dhe zhvillimi i qëndrueshëm. Kosova është i vetmi shtet në rajon që ka përfshirë në këtë marrëveshje edhe kapitullin për tregtinë me shërbime”, deklaroi Hajdari.
Mundesh me e lexu edhe…
Sipas saj, një nga përfitimet kryesore të marrëveshjes është eliminimi i tarifave doganore për produktet industriale, duke lehtësuar kështu tregtinë ndërkombëtare. Po ashtu, ajo përmendi mundësitë e zgjerimit të bashkëpunimit mes bizneseve kosovare dhe atyre nga shtetet anëtare të EFTA-s, që përfshijnë Islandën, Lihtenshtajnin, Norvegjinë dhe Zvicrën.
Gjatë takimit, përfaqësuesit e bizneseve u informuan për aspektet praktike të marrëveshjes dhe mundësitë që ajo ofron për tregtinë e lirë. Kosova, ndryshe nga vendet e tjera të rajonit që kanë nënshkruar marrëveshje të ngjashme, ka negociuar edhe për tregtinë e shërbimeve, një element që pritet të ndihmojë në zgjerimin e sektorëve ekonomikë.
Marrëveshja për Tregti të Lirë me EFTA-n u nënshkrua muajin e kaluar në Davos të Zvicrës, ku kryeministri Albin Kurti dhe përfaqësuesit e EFTA-s theksuan përfitimet e ndërsjella të saj. Kjo marrëveshje synon të rrisë konkurrencën dhe tërheqjen e investimeve të huaja, duke e pozicionuar Kosovën si një destinacion më të favorshëm ekonomik në rajon./Katror.info
Përgatiti:
