Komisioni Qendror i Zgjedhjeve (KQZ) ka bërë të ditur se partitë politike kanë afat deri më 7 dhjetor 2025 për të dorëzuar listat e kandidatëve që do të garojnë në zgjedhjet e parakohshme të Kuvendit të Kosovës, të planifikuara për më 28 dhjetor.
“Afati për dorëzimin e listës së kandidatëve është deri më 7 dhjetor 2025. Aplikimi bëhet përmes platformës elektronike të KQZ-së: https://apliko.kqz-ks.org“, njofton KQZ.
Deri më tani, 23 subjekte politike kanë aplikuar në KQZ, disa duke garuar të vetme, ndërsa të tjera kanë formuar koalicione parazgjedhore.
Mundesh me e lexu edhe...
Lëvizja Vetëvendosje do të marrë pjesë në zgjedhje përmes “Koalicionit Lëvizja Vetëvendosje”, ku përfshihen partnerët e saj të deritanishëm, Guxo dhe Alternativa, si dhe Partia Shqiptare Demokristiane (PSHDK).
Ndryshe, partitë tjera parlamentare do të garojnë me listat e tyre të veçanta. Partia Demokratike e Kosovës, Lidhja Demokratike e Kosovës dhe Aleanca për Ardhmërinë e Kosovës do të garojnë të pavarura, ndërsa Nisma Socialdemokrate e Fatmir Limajt, e cila në zgjedhjet e fundit ishte pjesë e koalicionit me AAK-në, këtë herë do të konkurojë e vetme.
KQZ thekson rëndësinë e respektimit të afatit të dorëzimit të listave për të garantuar një proces zgjedhor të rregullt dhe transparent./Katror.info
