Komisioni Qendror i Zgjedhjeve ka thënë se pret që të mërkurën (5 mars) të përfundojë numërimi edhe i votave të fundit, atyre me kusht dhe të personave me aftësi të kufizuara.
Zëdhënësi i këtij institucioni, Valmir Elezi, ka thënë se aktualisht janë duke u numëruar edhe kutitë e fundit të votave me postë, numërim ky që pritet të përfundojë deri në orën 16:00.
Në konferencën për medie të mbajtur të martën, Elezi ka thënë se janë rreth 15 mijë vota me kusht që duhet të numërohen, teksa numri i votave të personave me aftësi të kufizuara është dukshëm më i ulët.
Mundesh me e lexu edhe…
“Në QNR ka filluar procesi i numërimit të votave me kusht dhe të votave të personave me nevoja të veçanta. Numërimi i këtyre fletëvotimeve do të përmbyllet deri nesër. Sot janë duke u numëruar 10 kutitë e fundit të votave me postë, ky proces do të përmbyllet deri në ora 16:00”, ka thënë ai.
Ai ka shtuar se Paneli Zgjedhor për Ankesa dhe Parashtresa ka marrë një vendim të martën për të llogaritur të vlefshme disa fletëvotime që gjatë procesit të numërimit në QNR janë llogaritur të pavlefshme nga ana e ekipeve të numërimit.
Deri tash janë kryer numërimet nga vendvotimet dhe ato në përfaqësi diplomatike. Sipas rezultateve aktuale, Lëvizja Vetëvendosje ka mbi 42 për qind apo 48 ulëse në Kuvend.
Partia Demokratike që doli e dyta në vendvotimet në Kosovë dhe e treta në diasporë, ka 21 për qind apo 24 ulëse.
Lidhja Demokratike e Kosovës u rrit me votat në diasporë dhe në total ka mbërritur në 20 ulëse në Kuvend, me mbi 18 për qind të votave.
Koalicioni AAK-Nisma mbetet me tetë ulëse apo pak mbi 7 për qind të votave, nga numërimet e deritashme.
Janë mbi 15 mijë vota për t’u numëruar në procesin e fundit./Katror.info
Përgatiti:
