Procesi zgjedhor në Kosovë po zhvillohet pa probleme dhe pa ndonjë pengesë që mund të ndikonte në mbarëvajtjen e tij, ka deklaruar zëdhënësi i Komisionit Qendror të Zgjedhjeve (KQZ), Valmir Elezi, gjatë një konference për media.
Lidhur me shqetësimet e ngritura nga disa media për mundësinë që ngjyra e aplikuar në gishtin e votuesve të fshihet shpejt, Elezi theksoi se kjo nuk është masa e vetme e sigurisë e përdorur nga KQZ-ja.
“Të gjithë personat që votojnë, pasi që identifikohen me një dokument zyrtar të Republikës së Kosovës, nënshkruajnë në hapësirën tek emri i tyre, pasi votojnë. Ky nënshkrim ia pamundëson një votuesi të votojë sërish”, tha ai./Katror.info
