Kanë mbetur pak ditë deri në zgjedhjet parlamentare të 9 shkurtit, të parat të rregullta që nga shpallja e pavarësisë më 2008. Sipas Komisionit Qendror të Zgjedhjeve (KQZ), numri i qytetarëve me të drejtë vote për këto zgjedhje është 2,075,868 votues, prej të cilëve 1,970,944 janë votues brenda Kosovës dhe 104,924 janë regjistruar për të votuar jashtë Kosovës.
Procesi zgjedhor në Republikën e Kosovës, do të organizohet në 903 Qendra të Votimit me gjithsej 2,533 Vendvotime, të shpërndara në 38 komuna, ndërkaq, ai jashtë Kosovës do të organizohet në 17 Ambasada dhe 15 Konsullata të të vendosura në 19 shtete të ndryshme të botës.
Për zgjedhjet e 9 shkurtit janë certifikuar 28 subjekte politike me 1,280 kandidatë, që do të garojnë për 120 ulëset në Kuvendin e Kosovës. Prej tyre, 19 janë parti politike, pesë koalicione, dy nisma qytetare dhe një kandidat i pavarur.
Mundesh me e lexu edhe…
Sipas ndryshimeve të fundit ligjore, qytetarët do të mund të zgjedhin një subjekt politik dhe deri në dhjetë kandidatë për deputetë, për dallim nga 5 kandidatë sic ishin ne zgjedhjet e kaluara.
Në anën e majtë të fletëvotimit, votuesi duhet të zgjedhë vetëm një subjekt politik dhe në anën e djathtë të fletëvotimit, votuesi mund të zgjedhë deri në 10 kandidatë për deputetë të atij subjekti politik.
Qendrën e votimit mund ta gjeni përmes websitetit kqz-ks.org; ose në zyrën e Komisionit Komunal të Zgjedhjeve në komunën tuaj.
Në ditën e zgjedhjeve, paraqitni një dokument të vlefshëm identifikimi (letërnjoftim,pasaportë, etj.) në qendrën e votimit.
Gjithashtu, heshtja zgjedhore do të fillojë një minutë para hapjes së qendrave të votimit, në orën 07:00, dhe do të zgjasë deri në mbylljen e tyre, në orën 19:00, ndryshe nga sa ishte me heret qe heshtja zgjedhore fillonte 24 ore para ditës së zgjedhjeve.
Këtë vit rreth 126 mijë të rinj do të mund të votojnë për herë të parë.
Për të siguruar procesin zgjedhor dhe për të parandaluar manipulimet, Komisioni Qendror i Zgjedhjeve (KQZ) ka blerë 2 mijë e 500 kamera vëzhguese, bashkë me pajisje përcjellëse, për të monitoruar dhe vëzhguar procesin zgjedhor.
KQZ gjithashtu ka vendosur një numër maksimal të votuesve për çdo vendvotim: 999 për zonat rurale dhe 950 për ato urbane, për të siguruar një organizim më efikas dhe për të parandaluar mbingarkesën e qendrave të votimit.
Misioni i BE-së për vëzhgimin e zgjedhjeve në Kosovë do të jetë i pranishëm për të siguruar që procesi zgjedhor të respektojë ligjin e Kosovës, standardet ndërkombëtare dhe rekomandimet e mëparshme.
Ky mision është i vetmi ndërkombëtar me prani afatgjatë për këto zgjedhje dhe do të përfshijë mbi 100 vëzhgues të shpërndarë në terren, të cilët do të mbikëqyrin çdo hap të procesit zgjedhor për të garantuar që gjithçka të zhvillohet në përputhje me parimet demokratike./Katror.info
Përgatiti:
