Një dilemë iu shtua javëve të fundit qytetarëve të Prishtinës: Ku me i pagu faturat për mbeturinat? E gjithë kjo është pasojë e mosmarreveshjeve mes Komunës së Prishtinës dhe kompanisë publike “Pastrimi”.
Komuna ka deklaruar se nga 1 janari 2025, pagesat nuk duhet të bëhen tek “Pastrimi”, e në anën tjetër, kompania publike në fjalë u ka bërë thirrje qytetarëve që të vazhdojnë pagesat si më parë.
Sipas zyrtarit të Drejtorisë së Shërbimeve Publike në Komunën e Prishtinës, Afrim Gashi, qytetarët tash për tash pagesat duhet t’i bëjnë përmes Komunës, derisa të jepet përgjigja nga Gjykata Kushtetuese.
Mundesh me e lexu edhe…
“Në Legjislaturën e fundit të Kuvendit Komunal të Prishtinës, shumica dhe kanë votu që thjesht ‘’Kompanisë Pastrimi’’ me ua lënë, domethënë që me menaxhu situatën. Për neve është e papranueshme kjo punë. Edhe Komuna e Prishtinës e ka çu në Gjykatë Kushtetuese këtë vendim që ne e konsiderojmë që nuk është i ligjshëm, se ka rënë në kundërshtim me interesin e qytetarëve të vet. Kështu që tash na jemi në pritje, derisa të zgjidhen këto probleme edhe këto konteste që janë mes nesh dhe kompanisë pastrimi, atëherë ne qytetarëve ju preferojmë që t’i bëjnë pagesat në Komunën e Prishtinës”, ka thënë ai për Katror Media.
Ndërsa, sipas informatave zyrtare të publikuara nga Kompania ‘’Pastrimi’’, ky vendim i Komunës për të bërë pagesat në Komunë, u konsiderua jo-ligjor, dhe u kundërshtua, duke kërkuar që qytetarët të mos bien pre e informatave jo të sakta.
Qëndrimi zyrtar publik i KMR Pastrimi
“Qytetarët duhet të vazhdojnë pagesat ndaj KRM “Pastrimi” Duke qenë se ky vendim nuk ka asnjë bazë ligjore dhe përbën një tejkalim të kompetencave nga Komuna e Prishtinës, ftojmë të gjithë qytetarët që: Të mos bien pre e këtij manipulimi dhe të vazhdojnë pagesat e tyre ndaj KRM “Pastrimi”, siç është përcaktuar në rregulloren e miratuar ligjërisht”, thuhet në njoftimin e kompanisë Pastrimi.
Për të mbështetur këtë vendim, të cilën Komuna e Prishtinës, në anën tjetër ka argumentuar se ka bazë të plotë ligjore, duke u thirrur në kompetencat e saj për menaxhimin e shërbimeve publike, Gashi thotë se shërbimin për të cilën është kontraktuar kompania Pastrimi nuk ka arritur ta kryejë siç duhet. Andaj ai thotë se me 3 shkurt Komuna e Prishtinës për shkak të mbeturinave shpalli gjendje të jashtëzakonshme.
”Çka ka qenë në kompetencë të Komunës së Prishtinës, ne i kemi kry obligime të gjitha. Domethanë i kemi pas kontratat gjithmonë të lidhura me Kompaninë Pastrimi. Pagesat i kemi bë të rregullta mujore, ata asnjëherë nuk kanë pasë probleme me pagesat që ne ua kemi kry, mirëpo pse ata nuk kanë mujtë me dalë prej krizës dhe prej situatës, ne nuk nuk jemi fajtorë.”
“Është çështje menaxhimit të tyre të brendshëm, kështu që ata thjesht s’kanë arritë thuajse tri vite të këtij mandati me dalë prej krizës, nuk kanë arritë me i shtu kapacitetet e veta, makineritë, ndërsa ne gjithmonë ju kemi ofru mbështetje domethënë edhe me kamionë të ri që i kemi ble, tetë që i kemi ble, gjashtë prej tyre ua kemi dhanë, edhe dy mendojmë që më vonë me ia bashkëngjitë flotës së tyre. Edhe dy herë i kemi ba furnizim me kontainerë. Herën e kaluar 1500, tash i kemi 2500 kontejnerë, me të cilët kemi me mbulu komplet qytetin e Prishtinës”, ka shtuar ai.
Në anën tjetër kompania Pastrimi thotë se do të vazhdojë mbledhjen e mbeturinave për qytetarët e Prishtinës, duke respektuar ligjet dhe vendimet institucionale dhe duke kërkuar bashkëpunim me qytetarët.
‘’KRM “Pastrimi” sh.a. do të vazhdojë të ofrojë shërbimin e mbledhjes dhe menaxhimit të mbeturinave për qytetarët e Prishtinës, duke respektuar ligjet dhe vendimet institucionale.’’
‘’Lusim qytetarët të na lajmërojnë për çdo rast ku mbeturinat nuk janë mbledhur, dhe ne do të vazhdojmë ta kryejmë detyrën tonë. Qytetarët janë prioriteti ynë dhe ata nuk duhet të preken nga kjo krizë artificiale’’, thuhet në njoftim.
Në këtë përplasje të institucioneve, qytetarët janë ata që e pësojnë, sepse përveç që u shkaktohet konfuzion, në të njëjtën kohë, iu grumbullohen fatura të dyfishta, nga Komuna e Prishtinës dhe kompania ”Pastrimi” për shërbimin e njëjtë. Ndërsa qyteti vazhdon të kundermojë nga mbeturinat. /Katror.info
Përgatiti:
