Mbrojtësi i Kombëtares shqiptare, Marash Kumbulla, është prezantuar si lojtari më i ri i Mallorca.
Ai është huazuar nga Roma deri në fund të sezonit 2025/26, ndërsa me klubin italian ka kontratë deri në verën e vitit 2027.
“Jam shumë i lumtur që jam këtu. Fola me drejtorin dhe trajnerin, të cilët kanë shumë besim tek unë. Më treguan shumë për projektin e Mallorcas dhe sapo më telefonuan, doja të vija sa më shpejt të ishte e mundur”, ka thënë Kumbulla për faqen zyrtare të klubit.
Mundesh me e lexu edhe…
Ai ka theksuar se dëshiron të lërë gjurmë te Mallorca.
“Dua të luaj sa më shumë ndeshje dhe ta ndihmoj ekipin të arrijë sa më lart. Shpresoj që gjithçka të shkojë sipas planit. Trajneri më shpjegoi se çfarë kërkon, për klubin, tifozët dhe gjithçka që përfaqëson Mallorca. Më pëlqeu shumë”, është shprehur futbollisti shqiptar.
Kumbulla ka folur edhe për marrëdhënien e tij me Vedat Muriqin, sulmuesin e Kosovës. “Kam folur me Vedatin kur u takova këtu në Espanyol. Kam një marrëdhënie të mirë me të dhe mezi pres ta shoh përsëri”, ka treguar ai.
Mbrojtësi shqiptar ka pasur një mesazh edhe për tifozët. “Faleminderit për mikpritjen. Do të jap gjithçka për këtë stemë dhe mezi pres të luaj me fanellën e Mallorca”, është shprehur ai, shkruan RTK.
Sezonin e kaluar, Kumbulla ka qenë i huazuar te Espanyol, ku kishte zhvilluar tridhjetë e gjashtë ndeshje. Me kombëtaren shqiptare, ai deri tani ka luajtur njëzet e katër herë./Katror.info
