Kohët kanë ndryshuar — bibliotekat apo zyret nuk janë më e vetmja zgjedhje për ata që punojnë apo mësojnë. Sot, gjithnjë e më shumë njerëz po kërkojnë ambiente që dalin jashtë formës tradicionale: vende që nuk ofrojnë vetëm kafe, por edhe frymëzim.
Në Prishtinë, disa kafene po e lexojnë këtë ndryshim dhe po transformohen në hapësira ku dizajni i kujdesshëm dhe atmosfera e qetë bashkohen për të nxitur përqendrimin, kreativitetin dhe punën produktive. Janë vende ideale, me ambient mikpritës ku mund ta nisësh ditën me një kafe të mirë dhe ta vazhdosh me punë, përfundimin e detyrave apo thjesht me leximin e një libri.
Lavjerrs’S, NewBornBrew dhe EspressO Lab janë vetëm tri nga shumë opsionet që ofron aktualisht kryeqyteti. Këto vende i japin përparësi komoditetit, ndriçimit të ngrohtë dhe një atmosfere miqësore – faktorë që i bëjnë të përshtatshme për studentë, punonjës të lirë, e këdo që kërkon një hapësirë për të punuar jashtë ambienteve tradicionale si bibliotekat apo zyret.
Psikologët kanë theksuar se ambienti fizik ndikon drejtpërdrejt në aftësinë për përqendrim.
Hulumtimet tregojnë se dritat natyrale, ngjyrat e buta, një nivel i lehtë zhurme në sfond dhe prania e elementëve të ngrohtë vizual ndikojnë pozitivisht në performancën njohëse.
Mundesh me e lexu edhe…
Për këtë arsye, ambientet e kafeneve të përzgjedhura shpesh krijojnë kushtet ideale për të punuar me ritëm të qëndrueshëm.
Arkitektët dhe dizajnerët e hapësirave të përbashkëta (co-working spaces) kanë vite që hulumtojnë ndikimin e dizajnit në ndjesinë dhe produktivitetin e individit.
Një studim nga Universiteti i Salford në Mbretërinë e Bashkuar vëren se ambientet e dizajnuara me kujdes mund të përmirësojnë performancën akademike deri në 25%.
Mobiliet e rehatshme, ngjyrat relaksuese dhe qasja fleksibile ndaj ndriçimit janë disa prej elementeve që i bëjnë këto kafene si vend ideale për të mësuar e për të punuar.
Një studim i publikuar në revistën Frontiers in Psychology ka hetuar ndikimin e muzikës në sfond në procesin e të mësuarit, duke marrë parasysh kapacitetin e kujtesës punuese të studentëve.
Rezultatet treguan se studentët me kapacitet më të lartë të kujtesës punuese përfituan nga muzika në sfond gjatë detyrave të kuptimit, ndërsa për ata me kapacitet më të ulët, muzika mund të ndikojë negativisht. Kjo sugjeron se ndikimi i muzikës në të mësuar varet nga karakteristikat individuale të studentëve.
Një tjetër studim i publikuar në PubMed Central ka shqyrtuar se si kombinimi i muzikës me faktorët e brendshëm hapësinorë ndikon në emocionet e studentëve gjatë komunikimit.
Studimi zbuloi se muzika në sfond, e kombinuar me ndriçim të ngrohtë dhe mobilim minimal, përmirëson ndjeshëm ndjenjat e kënaqësisë, dhe ndjenjës së kontrollit tek studentët. Kjo tregon se ambientet e dizajnuara me kujdes, që përfshijnë muzikë të lehtë dhe ndriçim të ngrohtë, mund të krijojnë një atmosferë të përshtatshme për të mësuar dhe për të punuar.
Përtej trendit, kafetë si Lavjerrsi, NewBornBrew dhe EspressO Lab përfaqësojnë një realitet të ri urban – një mënyrë jetese ku puna, mësimi dhe rekreacioni ndodhin në të njëjtin vend. Me orare më të gjata se bibliotekat dhe një atmosferë më pak formale, këto hapësira janë kthyer në pika të rëndësishme takimi për komunitetin kreativ të qytetit.
Ndërsa Prishtina vazhdon të zgjerohet dhe të bëhet gjithnjë e më e larmishme, po rritet edhe kërkesa për vende që ofrojnë më shumë se vetëm një pauzë për kafe. Kafenetë që dikur vizitoheshin për një pushim të shkurtër, sot po kthehen në ambiente të rehatshme e të ngrohta, ku njerëzit punojnë, mësojnë dhe frymëzohen – gjithmonë të shoqëruar nga aroma e një kafeje të mirë :).
Në kërkim të vendit ideal për punë? Këto tri kafene në Prishtinë kanë gjithçka!
Lavjerrs’S – Ku kafeja lidhet me kreativitetin
Në zemër të Prishtinës, vetëm disa hapa larg Postës qendrore, gjendet një prej vendeve më të dashura për të rinjtë: Lavjerrs’S-i. Nuk është vetëm një kafene për të shijuar një kafe të mirë – është një pikë takimi për ide, kreativitet dhe përqendrim.
Madje, mund të thuhet se është kthyer në një urë lidhëse midis studimit dhe frymëzimit, mes punës individuale dhe komunitetit bashkëkohor të mendjes së hapur.
Ajo që e dallon Lavjerrsin nuk është vetëm dizajni i ngrohtë apo aroma e kafesë që përhapet lehtë në ajër – por mënyra si ky vend arrin të krijojë një ambient ku mund të hysh vetëm me një laptop dhe të dalësh me një ide të re, një detyrë të përfunduar, apo një mendim më të qartë.
Këtu, studentët gjejnë qetësinë që ndonjëherë u mungon në shtëpi apo në bibliotekat me orar të kufizuar. Freelancer-at dhe punonjësit e pavarur ndihen pjesë e një ritmi të përbashkët pune, edhe pa shkëmbyer fjalë. Dhe për të gjithë këta njerëz të ndryshëm, Lavjerrsi ofron një gjë të përbashkët: ndjesinë se nuk janë vetëm në procesin e tyre.
Pavarësisht nëse shkon në mëngjes, kur drita natyrale mbush hapësirën dhe laptopët fillojnë të hapen ngadalë, apo pasditeve, kur tavolinat janë të mbushura me fletore, libra dhe kafe të freskëta, Lavjerrsi mbetet i gjallë – një laborator idesh të heshtura.
NewBorn Brew: Një copë Amerike në zemër të Prishtinës, ku puna bëhet me shije
NewBorn Brew është një nga ato vende në Prishtinë që nuk të tërheq vetëm për shkak të kafesë, por për të gjithë përvojën që ofron. Me një stil të theksuar amerikan dhe një atmosferë moderne e të hapur, kjo kafene është bërë zgjedhje e preferuar për studentë, freelancerë dhe profesionistë të rinj që kërkojnë një ambient të përshtatshëm për punë. Çdo detaj duket i menduar mirë – që nga tavolinat e gjera, ndriçimi i butë dhe i ngrohtë, e deri te muzika në sfond që nuk shpërqendron, por krijon një ritëm të lehtë për punë.
Ajo që e bën NewBorn Brew të veçantë është zona e dedikuar për studim dhe punë. E ndarë nga pjesa tjetër e kafenesë, kjo hapësirë ofron qetësinë që duhet për përqendrim, me akses të plotë në prizë për çdo tavolinë, karikues dhe një lidhje të qëndrueshme interneti. Nëse harron ndonjë mjet pune, stafi – gjithmonë i buzëqeshur dhe i gatshëm – është aty për të ndihmuar.
Mikpritja e tyre, bashkë me ambientin e ngrohtë dhe komod, e bëjnë këtë vend një “bazë pune” të përkryer për ditët kur nuk dëshiron të jesh në bibliotekë apo zyrë. NewBorn Brew nuk është vetëm një kafene – është një hapësirë ku puna, përqendrimi dhe një filxhan i mirë kafeje takohen në mënyrën më të natyrshme.
Më shumë se një kafene: EspressO Lab, vendi ku pushimi takon produktivitetin
EspressO Lab ishte një surprizë e këndshme. Fillimisht, kur e vizitova në javën e parë të hapjes, mendova se ishte thjesht një kafene e bukur ku shkon për një filxhan të mirë kafeje ose për të shijuar një copë lemon bread. Por me kalimin e kohës, ajo nisi të ofronte shumë më tepër se kaq.
Sot, EspressO Lab është kthyer në një vend ku mund të marrësh laptopin dhe të përfundosh një detyrë që ke lënë përgjysmë, të punosh mes pauzave të ligjëratave ose thjesht të përdorësh pushimin nga puna për të qenë produktiv në një ambient të qetë dhe komod.
Me një dizajn minimalist, dritë natyrale dhe tavolina të vendosura në mënyrë që të mos pengohesh nga zhurma e zakonshme e kafenesë, EspressO Lab ofron hapësira që të ndihmojnë të përqendrohesh. Është bërë një pikë e preferuar jo vetëm për të shijuar kafenë, por edhe për ata që duan të qëndrojnë pak më gjatë, të lexojnë, të shkruajnë apo të punojnë në një atmosferë të rehatshme. Në pak kohë, ky vend ka arritur të balancojë për mrekulli mes shijes, estetikës dhe funksionalitetit.
Kafene apo bibliotekë? Dy mënyra për të mësuar dhe punuar, dy botë të ndryshme
Për U.G., student në Fakultetin e Mjekësisë, biblioteka mbetet gjithmonë opsioni më i mirë për të mësuar.
“Ambientet ku mësojmë janë shumë të rëndësishme. Qetësia, pastërtia dhe energjia e vendit ndikojnë në përqendrim dhe produktivitet. Fatkeqësisht, në Kosovë bibliotekat nuk kanë kushtet e duhura dhe mungojnë investimet. Shumë studentë detyrohen të mësojnë në kafene, por për mua ato nuk janë të përshtatshme për shkak të zhurmës, duhanit dhe mungesës së hapësirës. Biblioteka mbetet opsioni më i mirë, por është e domosdoshme që ato të përmirësohen dhe të modernizohen”, tha ai.
Ndërsa U.G. preferon bibliotekën për qetësinë që ajo ofron, L.B., studente në Fakultetin e Filologjisë, i favorizon hapësirat më relaksuese, si Lavjerr’S-i.
“Përtej bibliotekave tradicionale, të cilat shpesh karakterizohen nga një atmosferë e rëndë, e heshtur dhe ndonjëherë edhe depresive, Lavjerrësi ofron një alternativë më të ngrohtë dhe mikpritëse. Ambienti i tij relaksues dhe fleksibiliteti që ofron i japin studentëve mundësinë jo vetëm të përqendrohen në mësim, por edhe të çlodhen e të rigjejnë motivimin. Ky kontrast e bën Lavjerrësin jo vetëm një hapësirë më funksionale, por edhe më atraktive për të rinjtë që kërkojnë balancë mes përqendrimit dhe mirëqenies personale”, tha ajo.
Në Prishtinën e sotme, ku të rinjtë kërkojnë më shumë se vende klasike për të pirë kafe, Lavjerrsi është dëshmi se hapësirat e përbashkëta, të dizajnuara me mendje dhe ndjeshmëri, mund të shërbejnë si platforma të vogla për zhvillim personal dhe profesional.
Sepse ndonjëherë, ajo që të duhet nuk është vetëm një kafe e mirë – por një ambient ku edhe mendimet e tua të ndihen mirë. /Katror.info
Përgatiti:
