Kryeministri në detyrë, Albin Kurti, ka votuar sot në Fakultetin Juridik në Prishtinë, në kuadër të raundit të dytë të zgjedhjeve lokale që po mbahen në 18 komuna të Kosovës.
Pas votimit, Kurti tha se kjo është “një ditë e mirë për demokracinë dhe vullnetin e lirë” dhe u bëri thirrje qytetarëve të ushtrojnë të drejtën e tyre të votës.
“Republika e Kosovës mban zgjedhjet në raundin e dytë për balotazh në 18 komuna të shtetit tonë. Unë posa votova këtu në Prishtinë, në ndërtesën e Fakultetit Juridik. U bëj thirrje gjithë qytetarëve me të drejtë vote që të shfrytëzojnë rastin dhe të bëhen pjesëmarrës e vendimmarrës për kryetarët e komunave, dhe kësisoj për katërvjeçarin në vijim si banorë të komunave të Republikës,” tha Kurti.
Mundesh me e lexu edhe…
Ai shtoi se procesi pritet të zhvillohet qetë dhe në rregull, duke theksuar përgatitjet e bëra nga Komisioni Qendror i Zgjedhjeve (KQZ).
“Gjithçka do të shkojë mbarë e mirë. Komisioni Qendror i Zgjedhjeve ka bërë përgatitjet e nevojshme dhe të gjithë komisionerët e vëzhguesit tashmë ndodhen në qendrat e votimit,” tha ai.
Procesi i balotazhit për zgjedhjet lokale po mbahet sot në 18 komuna të Kosovës./Katror.info
