Aktgjykimi i Gjykatës Kushtetuese lidhur me seancën konstituive të legjislaturës së nëntë të Kuvendit të Kosovës do të publikohet pasi të përfundojnë të gjitha procedurat e parashikuara me Ligjin për Gjykatën Kushtetuese dhe me Rregulloren e punës së Gjykatës përkitazi me publikimin e vendimeve.
Kështu thuhet në përgjigjen që ky institucion i ka dërguar RTK-së, teksa nuk janë dhënë detaje tjera dhe as datë se kur mund të ndodhë një gjë e tillë.
“Pas finalizimit të tekstit, aktgjykimi do t’u dërgohet të gjitha palëve të përfshira në rast, do të publikohet në ueb-faqen e Gjykatës dhe i njëjti do të dërgohet për publikim edhe në Gazetën Zyrtare”, thuhet tutje në përgjigje.
Mundesh me e lexu edhe…
Gjykata Kushtetuese më 8 gusht njoftoi se ka vendosur në lidhje me vlerësimin e kushtetutshmërisë së “Vendimit të Kuvendit për votimin e Komisionit për votim të fshehtë, në kuadër të vazhdimit të seancës konstituive të Legjislaturës IX të Kuvendit, të mbajtur sipas transkriptit të datës 29 qershor 2025”, të parashtruar nga KO193/25, Memli Krasniqi dhe 12 deputetë të tjerë dhe KO196/25, Hykmete Bajrami dhe 10 deputetë të tjerë, bazuar në paragrafin 5 të nenit 113 të Kushtetutës së Republikës së Kosovës.
Si rrjedhojë, Gjykata Kushtetuese konstatoi njëzëri, që deputetët e zgjedhur të Kuvendit të Republikës së Kosovës nuk kanë zbatuar Aktgjykimin e 26 qershorit 2025, të Gjykatës Kushtetuese të Republikës së Kosovës në rastin KO124/25, dhe rrjedhimisht të gjitha seancat e mbajtura nga data 27 qershor deri më 26 korrik 2025 shpallen të pavlefshme.
Gjykata konstatoi njëzëri, që Kryesuesi i Seancës Konstituive të Kuvendit të Republikës së Kosovës, nuk ka vepruar në pajtueshmëri me Aktgjykimin e Gjykatës Kushtetuese të Republikës së Kosovës në rastin KO124/25, të 26 qershorit 2025 dhe rrjedhimisht veprimet e tij janë në papajtueshmëri me paragrafin 1 të nenit 116.
Kushtetuesja urdhëroi me 6 vota për dhe 1 kundër, Kryesuesin e Seancës Konstituive të Kuvendit të vazhdojë me pikën 3 të rendit të ditës së Seancës Konstituive, të miratuar më 8 prill 2025, dhe në pajtim me paragrafin 2 të nenit 67 [Zgjedhja e Kryetarit dhe Nënkryetarëve] të Kushtetutës së Republikës së Kosovës, të ftojë përfaqësuesin e grupit më të madh parlamentar për të propozuar kandidatin/en për Kryetar/e të Kuvendit të Republikës së Kosovës, i/e cili/cila zgjedhet përmes votimit të hapur, votimi i cili mund të realizohet vetëm deri në 3 herë për kandidatin/en e njëjtë.
Po ashtu, kjo gjykatë urdhëroi njëzëri të gjithë deputetët e zgjedhur të Kuvendit të Republikës së Kosovës, që në pajtim me nenin 4 [Forma e Qeverisjes dhe Ndarja e Pushtetit], nenin 7 [Vlerat] dhe nenin 74 [Ushtrimi i Funksionit] të Kushtetutës së Republikës së Kosovës gjatë procedurës së zgjedhjes së Kryetarit/es dhe nënkryetarëve të Kuvendit të Republikës së Kosovës të jenë të pranishëm dhe të votojnë; Urdhëroi me 6 vota për dhe 1 kundër deputetët e zgjedhur të Kuvendit të Republikës së Kosovës, në pajtim me paragrafët 2, 3 dhe 4 të nenit 67 [Zgjedhja e Kryetarit dhe Nënkryetarëve] të Kushtetutës së Republikës së Kosovës të zgjedhin Kryetarin/en dhe nënkryetarët e Kuvendit të Republikës së Kosovës sipas pikave 3 dhe 4 të rendit të ditës të Seancës Konstituive brenda 30 ditëve nga dita e hyrjes në fuqi të këtij Aktgjykimi.
Gjykata gjithashtu vendosi që të vazhdojë masën e përkohshme të vendosur më 24 korrik 2025, ku i ndalohej deputetëve çdo veprim për konstituimin e Kuvendit, deri në hyrjen në fuqi të këtij Aktgjykimi.
Vendimi i Kushtetueses më 8 gusht është mirëpritur nga partitë që në legjislaturën e kaluar ishin në opozitë, duke e vlerësuar si fitore të demokracisë, derisa është kundërshtuar ashpër nga partia në pushtet. LVV e cilësoi atë si një devijim të rrezikshëm nga roli i saj kushtetues dhe si ndërhyrje flagrante në kompetencat e Kuvendit./RTK/Katror.info.
