Gjatë konferencës “Media Talk Day”, u lansua zyrtarisht platforma interaktive Verifiko.info, një iniciativë inovative e organizatës Democracy for Development (D4D), e cila synon të fuqizojë edukimin medial dhe mendimin kritik tek të rinjtë në Kosovë.
Platforma është zhvilluar në bashkëpunim të ngushtë me nxënës të shkollave të mesme nga Prishtina dhe Mitrovica, të cilët kontribuuan nëpërmjet punëtorive krijuese gjatë fazës së dizajnimit dhe testimit. Në këtë proces ishin të përfshirë edhe mësimdhënës dhe përfaqësues të shkollave, duke siguruar që platforma të jetë e përshtatur për nevojat reale të nxënësve, raporton Katror.info.
Sipas D4D, qëllimi i Verifiko.info është të ndihmojë të rinjtë që të dallojnë lajmet e rreme, të kuptojnë ndikimin e mediave dhe të zhvillojnë aftësi për të naviguar sigurt në botën digjitale.
Mundesh me e lexu edhe…
Platforma është falas, e qasshme dhe në shërbim të të gjitha shkollave të mesme në Kosovë. Ajo vazhdon të zhvillohet dhe përmirësohet, duke ofruar mjete praktike dhe përmbajtje edukative për të ndërtuar një gjeneratë të re më të vetëdijshme medialisht.
Ky projekt është realizuar me mbështetjen e programit “Mbështetje për Shoqërinë Civile në Kosovë”, i financuar nga Dukati i Madh i Luksemburgut dhe i implementuar nga LuxDev – Agjencia për Bashkëpunim Zhvillimor e Luksemburgut./Katror.info
