Pilotimi i shërbimeve të integruara për ngjarjen jetësore të lindjes së fëmijës është lansuar, duke shënuar një hap të rëndësishëm në modernizimin e ofrimit të shërbimeve publike, shkruan Katror.info.
Kryeministri Albin Kurti theksoi se kjo nismë prek drejtpërdrejt jetën e qytetarëve, veçanërisht atë të familjeve të reja
“Me këtë pilotim po hapim një kapitull të ri në mënyrën se si shteti ofron shërbime publike – më të afërta me qytetarin, më të koordinuara, më digjitale dhe më të thjeshta”, deklaroi ai.
Mundesh me e lexu edhe…
Sipas Kurtit, kjo iniciativë është konceptuar nga perspektiva e qytetarëve, me synimin që lindja e një fëmije të mos shoqërohet me barrë administrative, por me lehtësira. “Prindërit nuk do të kenë më nevojë të enden nga një sportel në tjetrin për të kryer procedurat e nevojshme. Të gjitha të dhënat për regjistrimin e fëmijës, përfitimet, sistemin shëndetësor dhe vaksinimin do të mblidhen që në spital, në momentin e lindjes, dhe do të shpërndahen automatikisht në institucionet përkatëse”, shpjegoi ai.
Ndër shërbimet e përfshira në këtë zgjidhje janë: regjistrimi i lindjes në regjistrin civil, aplikimi për përfitime për nënën dhe fëmijën, regjistrimi në sistemin shëndetësor, regjistrimi i vaksinave, hapja e llogarive në e-Kosova për prindërit dhe njoftimi elektronik i institucioneve statistikore dhe shëndetësore. Gjithçka realizohet në mënyrë të automatizuar përmes platformës kombëtare të ndërveprimit.
Kryeministri e cilësoi këtë qasje si një mënyrë të integruar të kujdesit ndaj qytetarëve dhe e vlerësoi si një nga projektet kyçe të strategjisë së e-Qeverisjes 2023-2027. Sipas tij, kjo nismë pasqyron vizionin për një administratë publike digjitale, proaktive dhe gjithëpërfshirëse.
Ai theksoi gjithashtu se aktualisht në platformën e-Kosova janë të disponueshme mbi 220 shërbime dhe se vetëm në dy vitet e fundit numri i transaksioneve në këtë sistem është rritur me 155 për qind, nga 1.9 milion në 4.9 milionë. Kjo, sipas Kurtit, do të thotë më pak barriera dhe më shumë kohë të kursyer për qytetarët në jetën e tyre të përditshme.
Kjo iniciativë, e mbështetur nga Bashkimi Evropian dhe Qeveria Gjermane, zbatohet nga GIZ dhe ka për qëllim lehtësimin e qasjes në dokumentacionin dhe shërbimet e nevojshme për prindërit e rinj./Katror.info
Përgatiti:
