Në kuadër të pakos emergjente për energji dhe e mbështetur nga Komisioni Evropian, Ministria e Ekonomisë të enjten ka lansuar të enjten thirrjen publike për mbështetje për konsumatorët familjarë për investimin në pajisje efiçiente për ngrohje.
Të gjithë ata qytetarë të cilët blejnë klimë efiçiente, kalda me biomasë, pompë termike si dhe stufë individuale me biomasë do të subvencionohen nga fondet që janë siguruar nga Bashkimi Evropian.
Për kalda me biomasë vlera e subvencionit do të jetë 70%, apo deri në 1,200 euro, për klimë do të jetë 40% e vlerës apo deri në 400 euro, për pompë termike deri në 2 mijë euro ndërsa për stufë individuale me biomasë deri në 435 euro, raporton RTK.
Mundesh me e lexu edhe…
Në ceremoninë e lansimit kanë marrë pjesë kryeministri Albin Kurti e ministrja e ekonomisë Artane Rizvanolli, të cilët kanë bashkëbiseduar me qytetarë për këtë masë.
Kryeministri i Kosovës tha se përmes këtyre masave, do të ulet shpenzimi i energjisë.
“Teksa temperaturat kanë filluar të ulen, qytetarët do të kenë mundësi që shtëpitë e tyre t’i mbajnë të ngrohta. Ne tashmë kemi përkrahur rreth 40 mijë familje. Për këto familje kjo verë ka qenë më e freskët e dimri do të jetë më i ngrohtë”, tha ai.
Ndërsa, ministrja e Ekonomisë, Artane Rizvanolli tha se i gjithë procesi do të jetë transparent.
“Po hapim edhe një raund të masave. Është hera e 13 që po marrim masa të tilla. Me të gjitha këto masa ne kemi arritur investime rekorde në efiçiencë të energjisë”, shtoi ajo.
Masat e prezantuara sot nga Ministria e Ekonomisë, synojnë mbështetjen e konsumatorëve familjarë, në veçanti konsumatorët në nevojë si investimi në instalimin e pajisjeve efiçiente për ngrohje.
Pajisjet që blihen para datës së shpalljes së thirrjes, nuk do të subvencionohen.
Afati për aplikim është deri më datën 11 tetor të vitit 2024, ose deri në shpenzimin e buxhetit të alokuar për këtë thirrje.
Aplikimi bëhet online përmes platformës e-Kosova: https://ekosova.rks-gov.net/472
Kjo thirrje është ndër masat që financohen nga pakoja emergjente 75 milionëshe e Bashkimit Evropian me qëllim të zbutjes së ndikimit të krizës energjetike evropiane e të cilat zbatohen nga Ministria e Ekonomisë.
Informatat e plota të thirrjes mund t’i gjeni këtu. /Katror.info
Përgatiti:
