Xhudistja kosovare Laura Fazliu ka shkruar një tjetër faqe të artë në sportin e vendit, duke fituar medaljen e bronztë në Kampionatin Botëror të xhudos, që po mbahet në Budapest, raporton Katror.info.
Në kategorinë deri në 63 kilogramë, 24-vjeçarja u ngjit në podium, duke e përmbyllur garën si e treta më e mirë në botë.
Në përballjen për medaljen e bronztë, ajo triumfoi ndaj brazilianes Nauana Silva me një ippon të pastër, vetëm 70 sekonda pas fillimit të luftës. Kjo vjen pas një periudhe sfiduese për Fazliun, që ishte rikthyer në garë pas një lëndimi të pësuar në muajin mars.
Mundesh me e lexu edhe…
Me këtë rezultat, Fazliu shton një tjetër medalje botërore në koleksionin e saj, duke dëshmuar vazhdimësinë dhe nivelin e lartë të xhudos kosovare në arenën ndërkombëtare. Në kategorinë e saj konkurruan 44 xhudiste – një tregues i fortë i konkurrencës së madhe.
Kampionati Botëror i këtij viti po rezulton tejet i suksesshëm për Kosovën: pas medaljes së argjendtë të Distria Krasniqit, tani edhe Fazliu i shton lavdi ekipit tonë, duke çuar në 10 numrin total të medaljeve botërore për Kosovën në këtë sport./Katror.info
