Ylli i basketbollit dhe platforma UNINTERRUPTED* nxisin një mënyrë të re të të menduarit për punësimin dhe aftësitë që vlejnë për karrierën
Çfarë do të kishte ndodhur nëse askush nuk do ta kishte parë ndonjëherë LeBron James të luante basketboll?
Kjo është pyetja që udhëheq fushatën e re të UNINTERRUPTED dhe Indeed, The Main Thing, që synon të sfidojë standardet tradicionale të punësimit dhe të vlerësojë aftësitë që fitohen nga përvoja reale.
Mundesh me e lexu edhe…
Në seri, LeBron zhvillon biseda me figura të njohura si Tony Hawk, Teyana Taylor, Marques Brownlee dhe stilistja Melody Ehsani, duke treguar se krijimtaria, këmbëngulja dhe përvoja praktike mund të hapin rrugë drejt suksesit edhe pa një diplomë universitare.
“Puna që bën Fondacioni im për familjet na ka treguar se njerëzit lulëzojnë kur u jepet një mundësi,” tha LeBron James, duke shtuar se bashkëpunimi me UNINTERRUPTED dhe Indeed ndihmon më shumë njerëz të tregojnë aftësitë që tashmë zotërojnë. Maverick Carter, bashkëthemelues i platformës, theksoi se qëllimi është të prishen kufijtë e sistemit tradicional që shpesh lë jashtë njerëz me potencial.
E themeluar nga LeBron James dhe Carter, UNINTERRUPTED është një platformë shumë mediale që tregon anën njerëzore të sportit dhe argëtimit, si dhe po përdoret për të ndryshuar mënyrën si mendohet për rekrutimin.
“Njerëzit duhet të punësohen për atë që dinë të bëjnë, jo vetëm për titujt që kanë,” tha James Whitemore, drejtues i marketingut në Indeed, duke nënvizuar se përvoja praktike duhet të ketë po aq peshë sa kualifikimet formale.
Sipas drejtorit krijues Jamal Henderson, frymëzimi erdhi nga shprehja e preferuar e LeBron: “Fokusohu gjithmonë te ajo që ka vërtet rëndësi.”
Seria sjell sfida reale e momente spontane, nga Tony Hawk mbi skateboard deri te Ehsani që qep një veshje, për të treguar se aftësitë praktike vlejnë më shumë sesa diploma.
Henderson thekson se suksesi i projektit qëndron në autenticitetin dhe frymëzimin, jo në famën e protagonistëve. “Duam që njerëzit ta shohin dhe të mendojnë se është një histori që ia vlen të ndahet.”
Në thelb, The Main Thing është një mesazh që talenti ekziston kudo, por kërkon mundësinë për t’u vënë re. Për LeBron James, kjo fushatë pasqyron rrugëtimin e tij personal dhe misionin e UNINTERRUPTED për t’i ndihmuar njerëzit të marrin kontrollin mbi historinë e tyre.
“Suksesi për ne do të thotë t’u japim njerëzve rrugë të reja, ide të reja dhe besim se mund të arrijnë atë që duan, pavarësisht nga diploma apo prejardhja,” tha Carter.
Fushata është një thirrje për sipërmarrësit dhe drejtuesit që të rishikojnë kuptimin e “kualifikimeve”.
Ajo i fton bizneset të punësojnë mbi bazën e aftësive, të ndërtojnë partneritete autentike dhe të përdorin fuqinë e tregimit për të frymëzuar ndryshim. /shqip.al/Katror.info
* Platforma UNINTERRUPTED është krijuar me qëllimin për t’u dhënë sportistëve dhe figurave publike një zë të pavarur, ku ata mund të tregojnë historitë e tyre pa ndërmjetësim nga media tradicionale.
