Në kuadër të Mobile World Congress 2025, Lenovo ka prezantuar një koncept të ri laptopi që inkurajon përdoruesit të punojnë jashtë duke reduktuar varësinë nga kabllot e karikimit. PC Yoga Solar është një prototip inovativ që përmban një panel diellor të integruar në kapakun e laptopit, duke lejuar mbushjen e baterisë përmes dritës natyrore apo artificiale, shkruan Katror.info.
Laptopi është dizajnuar për të përthithur dhe konvertuar dritën e diellit në energji, megjithatë performanca e tij është më e lartë në kushte të favorshme, si gjatë ditëve me diell. Sipas Lenovo-s, paneli diellor përbëhet nga 84 qeliza dhe është ndërtuar me një sistem efikas që arrin një shkallë konvertimi mbi 24%. Kjo do të thotë se vetëm 20 minuta ekspozim ndaj dritës mund të sigurojë deri në një orë riprodhim videosh.
Ndërkohë që Yoga Solar mbetet një koncept dhe nuk ka plane për prodhim në masë, Lenovo ka njoftuar se ThinkBook Plus Gen 6 – një tjetër pajisje inovative me ekran OLED të rrotullueshëm – do të dalë në treg në qershor të vitit 2025 me një çmim prej 3,499 dollarësh.
Mundesh me e lexu edhe…
Sa i përket specifikave teknike, Yoga Solar vjen me një procesor Intel Lunar Lake, 32 GB RAM dhe 1 TB hapësirë ruajtëse, ndërsa trashësia e tij është vetëm 15 milimetra. Për të maksimizuar përfitimin nga drita, laptopi përfshin softuerin Dinamic Solar Tracking, i cili monitoron dhe shfaq në kohë reale prodhimin e energjisë nga paneli diellor.
Me këtë koncept, Lenovo synon të eksplorojë mundësi të reja për pajisje të pavarura nga rrjeti elektrik, duke ofruar një zgjidhje praktike dhe ekologjike për përdoruesit që kërkojnë fleksibilitet dhe qëndrueshmëri energjetike./Katror.info
Përgatiti:
