Në prag të Samitit të Komunitetit Politik Evropian, liderët e 47 vendeve dhe organizatave evropiane të mbledhur në Tiranë janë pritur me një program artistik mbresëlënës që përfshiu elementë të artit digjital dhe muzikës bashkëkohore shqiptare.
Në një atmosferë simbolike që ndërthurte traditën me teknologjinë, të pranishmit patën rastin të shohin përfaqësime vizuale të figurave më të shquara të historisë shqiptare të krijuara përmes inteligjencës artificiale.
Një nga momentet më të veçanta dhe të papritura ishte videoja prezantuese në të cilën 47 liderët evropianë u shfaqën të portretizuar si fëmijë, duke thënë në mënyrë të sinkronizuar: “Mirë se vini në Shqipëri”. Videoja, e realizuar përmes teknologjisë së inteligjencës artificiale, u prit me të qeshura dhe duartrokitje nga të pranishmit, duke krijuar një atmosferë miqësore dhe të ngrohtë.
Mundesh me e lexu edhe…
Kjo video u transmetua njëkohësisht në faqen zyrtare të Kryeministrit Edi Rama në Facebook, duke u bërë virale menjëherë pas publikimit.
Kjo pjesë u shoqërua me një performancë muzikore të kuruar me tingujt e këngës “Zjerm” nga grupi Shkodra Elektronike, duke ofruar një përjetim të veçantë të identitetit modern kulturor të Shqipërisë.
Kjo ngjarje kulturore paraprin samitin politik që zhvillohet të premten në kryeqytetin shqiptar, ku do të diskutohen çështje kyçe për sigurinë dhe mbrojtjen në kontinent, me agresionin e vazhdueshëm të Rusisë ndaj Ukrainës si pikë kryesore të agjendës.
Për vendet e Ballkanit Perëndimor, ky samit përfaqëson një mundësi strategjike për të rihapur debatin mbi zgjerimin e Bashkimit Evropian dhe për të theksuar rëndësinë e përshpejtimit të integrimit të rajonit në familjen evropiane./Katror.info
