Ndërsa gjethet fillojnë të marrin ngjyrat e arta dhe kafen e thellë, ajri bëhet më freskët dhe shëtitjet në natyrë marrin një tjetër kuptim, shumë njerëz ndihen veçanërisht të lidhur me vjeshtën. Por, çfarë e bën këtë stinë kaq të dashur? Ekspertët e psikologjisë thonë se arsyeja është më e thellë sesa thjesht kafet me shije kungulli apo pulovrat e ngrohta.
Vjeshta si “pikë referimi kohore”
Psikologët e përshkruajnë vjeshtën si një pikë referimi kohore-një moment në kalendar që na ndihmon të ndajmë jetën në faza mendore të dallueshme. Ashtu si ditëlindjet apo viti i ri, edhe fillimi i vjeshtës krijon një ndjenjë “fillimi të ri”.
“Pikat kohore na ndihmojnë të lëmë pas përvojat negative dhe të ndërtojmë një perspektivë të freskët,” – thotë Dr. Yasmine Saad, psikologe klinike, raporton Katror.info.
Mundesh me e lexu edhe…
Kjo është pjesërisht arsyeja pse shumë të rritur ndihen më të motivuar gjatë vjeshtës-një periudhë që historikisht lidhet me kthimin në shkollë dhe fillimin e një kapitulli të ri.
Rutina, rehatia dhe nostalgjia
Pas një vere plot udhëtime dhe orare të çrregullta, vjeshta rikthen strukturën në jetën e përditshme. Kjo krijon një ndjenjë qetësie dhe stabiliteti, duke lehtësuar lidhjet sociale dhe aktivitetet e zakonshme.
“Ka një rutinë komode që sjell kjo stinë. Njerëzit ndihen më të organizuar dhe më të lidhur me të tjerët,” – thotë Dr. Sanam Hafeez, neuropsikologe.
Përveç kësaj, ngrohtësia e rrobave të vjeshtës dhe përfundimi i “sezonit të rrobave të banjës” ndihmon në uljen e presionit për pamjen fizike, duke i bërë njerëzit të ndihen më rehat me trupin dhe veten e tyre.
Natyra si burim qetësie dhe lumturie
Flladet e freskëta, gjethet shumëngjyrëshe dhe ambientet natyrore janë një ftesë për të dalë jashtë dhe për të rritur mirëqenien mendore.
“Qëndrimi në natyrë rrit nivelet e oksigjenit në tru, gjë që ndihmon në çlirimin e serotoninës-neurotransmetuesi që na jep ndjenjën e lumturisë,” – shpjegon Dr. Hafeez.
Studimet kanë treguar se kontakti me natyrën përmirëson ndjeshëm ndjenjat e lumturisë, qëllimit jetësor dhe marrëdhënieve ndërpersonale.
Përgatitje emocionale për dimrin
Ekspertët thonë se vjeshta është një kohë ideale për të forcuar reziliencën emocionale, përpara se të mbërrijë dimri me ditët e tij të shkurtra dhe mungesën e dritës diellore.
“Vjeshta është koha për të mbledhur të gjitha mjetet që na duhen për të përballuar errësirën e dimrit. Psikologjikisht, është koha për të reflektuar mbi mënyrën si përballojmë emocionet negative,” – thotë Dr. Saad.
Si të përfitoni sa më shumë nga vjeshta?
Ekspertët rekomandojnë disa mënyra për të përmirësuar mirëqenien mendore gjatë kësaj stine:
- Dilni në natyrë: Bëni shëtitje, mblidhni mollë, vizitoni panaire apo bëni aktivitete jashtë me fëmijët.
- Vendosni qëllime të reja: Shfrytëzoni ndjenjën e fillimit për të përcaktuar qëllime personale dhe profesionale.
- Bëni gjëra që doni: Lexoni, luani sport, takohuni me miqtë, bëni art ose çfarëdo që ju sjell gëzim.
- Kërkoni ndihmë: Nëse ndjeni shenja të depresionit sezonal, mos hezitoni të kontaktoni një profesionist të shëndetit mendor.
Në fund të ditës…
Dashuria për vjeshtën nuk është thjesht një trend kulturor. Është një përgjigje psikologjike natyrore ndaj ndjenjës së rinisjes, strukturës, rehatisë dhe lidhjes me natyrën. Kjo stinë na jep mundësinë të reflektojmë, të rivendosim prioritetet dhe të përgatitemi emocionalisht për muajt që vijnë./Katror.info
