Sopranoja nga Kosova, Marigona Qerkezi, vlerëson se ka pasur nderin e jashtëzakonshëm të performonte në Premierën Botërore të “Pucciniana”, duke interpretuar disa nga veprat më të njohura të Giacomo Puccinit në përvjetorin e vdekjes së tij.
Ky koncert, një ngjarje historike për botën e operës, ishte një mundësi unike për Qerkezin për të nderuar trashëgiminë e kompozitorit të madh dhe për të shfaqur talentin e saj në skenën ndërkombëtare.
”Ishte një nder i jashtëzakonshëm të sillja në jetë “Pucciniana” në Premierën Botërore dhe të interpretoja disa nga veprat më të mëdha të Puccinit në 100-vjetorin e vdekjes së tij,” shkroi ajo, në një postim në rrjetet sociale.
Mundesh me e lexu edhe…
“Pucciniana” e kompozitorit italian Andrea Battistoni, e realizuar në njëqindvjetorin e vdekjes së Puccinit, mori një dimension të veçantë me zërin e Marigona Qerkezit në Operën Mbretërore të Wallonias në Liège, Belgjikë.
Ajo shpreh falënderimet më të sinqerta për dirigjentin dhe kompozitorin Andrea Battistoni, Maestro Giampaolo Bisanti, Tenorin Galeano Salas, Orkestrën dhe Korin e Operës Mbretërore të Wallonias në Liège për artin dhe energjinë e tyre.
Po ashtu, ajo falenderon publikun e mrekullueshëm të Liège dhe Operën Mbretërore të Wallonias që e mundësuan që ajo natë të ishte vërtet e paharrueshme, për të.
E ndërsa Marigona na bë krenarë për arritjet në skenën ndërkombëtare , shumë shpejt publiku mund ta shohë në Prishtinë.
Pas shumë vitesh mungese, Marigona Qerkezi rikthehet për të performuar në vendlindje, në koncertin e 10 dhjetorit, së bashku me tenorin Saimir Pirgu.
“Të dashur miq, shpesh më pyesni se kur do të rikthehem të performoj në Kosovë. Jam shumë e lumtur të ju ftoj në koncertin tonë më 10 Dhjetor 2024 në Prishtinë, ku rikthehem pas shumë vitesh, kësaj radhe për të performuar për herë të parë me Operën e Kosovës krahas tenorit fantastik Saimir Pirgu dhe dirigjentes së shkëlqyer Elda Laro,” pat shkruar ajo në një postim në rrjetet sociale.
Më 10 dhjetor 2024, Prishtina do të bëhet epiqendra e muzikës operistike me një gala koncert të jashtëzakonshëm. Në Sallën e Kuqe të Pallatit të Rinisë, publiku do të ketë mundësinë të shijojë një gala koncert, ku do të ngjiten në skenë tre yje të njohur ndërkombëtarë: tenori i shquar Saimir Pirgu, sopranoja me famë botërore Marigona Qerkezi, dhe dirigjentja e talentuar Elda Laro. /Katror.info
Përgatiti:
