Është mbajtur edicioni i parë i Forumit Financiar “Kosova Finance Forum” i cili për gjatë dy ditëve mblodhi në një vend institucione publike, kompani private, liderë vendorë dhe ndërkombëtarë si dhe shumë pjesëmarrës të tjerë.
Ky forum, i fokusuar në zhvillimin ekonomik në trajta të gjera dhe specifikisht në sektorin financiar si dhe në ndryshimet teknologjike, trajtoi tema të rëndësishme mbi këto zhvillime.
Në kuadër të hapjes së Forumit Financiar të Kosovës, është prezantuar numri i parë i revistës për ekonomi dhe biznes, “Kapitali”.
Mundesh me e lexu edhe...
“Kapitali” do të përmbajë një gamë të gjerë temash, duke përfshirë të rejat financiare, investimet, trendet e tregut dhe udhëheqësit e ndërmarrjeve të shumta nga biznesi.
E në ditën kryesore të këtij forumi, agjenda u nda në tre shtylla: panele diskutimi, punëtori si dhe fjalime e prezantime.
Në ngjarjen e organizuar, temat e diskutimit përfshinë një gamë të gjerë çështjesh kyçe në fushën e financave dhe ekonomisë.
Diskutimet filluan me panelin mbi stabilitetin financiar, sfidat e bankave qendrore dhe bashkëpunimin rajonal, duke u pasuar nga tematika e ndërtimit të një të ardhmeje të qëndrueshme financiare në kohë tranzicioni.
Një tjetër panel u fokusua në bankingun e hapur dhe shndërrimin e detyrimeve rregullatore në mundësi biznesi, ndërsa një fjalim kryesor trajtoi rrezikun dhe qëndrueshmërinë në sektorin e sigurimeve, transmeton Telegrafi.
Roli i mikrofinancës në transformimin ekonomik dhe digjital të Kosovës u diskutua gjithashtu, me vëmendje të veçantë mbi përmirësimin e përvojës së klientit dhe përputhshmërinë në bankim përmes zgjidhjeve digjitale.
Ngjarja u përmbyll me prezantime mbi subjektet si rëndësia e fondeve të investimeve, eksplorimi i monedhave digjitale, dhe ndikimi i tarifave tregtare në Ballkanin Perëndimor, duke sjellë një pasqyrë të plotë të tendencave dhe sfidave aktuale në sektorin financiar, e gjithashtu krijoi hapësira për rrjetëzim mes kryesueseve, bashkëpunëtoreve dhe pjesëmarrëseve.
Ky edicion i Kosova Finance Forum u mbështet nga Banka Qendrore e Kosovës (BQK) si partner institucional, nga IFC si sponsor institucional dhe nga NLB Banka si sponsor gjeneral. Ndërkaq, gold sponsor i forumit është Fundway. /Katror.info
Përgatiti:
