Më shumë se 50,000 paund mbeturina u hoqën nga Arktiku në vitin 2023 pas një përpjekjeje shumëpalëshe që mobilizoi vullnetarë për të pastruar ekosistemet kritike veriore.
Operacionet e pastrimit u zhvilluan gjatë verës së shkurtër arktike në Alaskë, Grenlandë, Norvegji dhe Islandë.
Rreth 2,000 vullnetarë u angazhuan nga shtetet anëtare të Këshillit të Arktikut, një panel ndërqeveritar i krijuar për të siguruar përdorimin paqësor dhe të qëndrueshëm të rajonit arktik, i cili përfshin shtetet që shtrihen brenda kufijve të tij të ngrirë dhe popujt indigjenë që jetojnë aty, shkruan Good News Network, transmeton Katror.info.
Mundesh me e lexu edhe…
Këshilli funksionon përmes grupeve të punës që adresojnë çështje të ndryshme. Një prej tyre, Mbrojtja e Mjedisit Detar Arktik (PAME), e themeluar në vitin 1991, bashkëpunoi me Ocean Conservancy dhe organizata lokale si Keep Norway Clean për të realizuar këtë operacion masiv si pjesë e iniciativës Arctic Cleanup.
Këto aksione vjetore kanë larguar mbi 100,000 paund mbeturina mes viteve 2021 dhe 2023, me Keep Norway Clean duke raportuar se shumica dërrmuese e mbeturinave vijnë nga industria e peshkimit.
Sipas kësaj organizate jofitimprurëse, pastrimi i Arktikut është sfidues dhe i kushtueshëm. Distancat e mëdha, terreni i vështirë, popullsia e shpërndarë, sezoni i kufizuar i pastrimit dhe infrastruktura e pamjaftueshme për menaxhimin e mbetjeve janë pengesat kryesore për realizimin e këtyre operacioneve vullnetare.
Fatmirësisht, izolimi i shumë zonave arktike kufizon hyrjen e mbetjeve në rajon. Pothuajse të gjitha ato transportohen nga rrymat dhe dallgët, duke u depozituar në brigjet shkëmbore./Katror.info
Përgatiti:
