Me temën frymëzuese “Ëndrra pa kufi, opera pa mure”, edicioni i pestë i Festivalit Ndërkombëtar të Operës “Rame Lahaj International Opera Festival” (RLIOF) do të zhvillohet nga 23 korriku deri më 2 gusht 2025, duke përfshirë tre qytete: Prishtinën, Pejën dhe Mitrovicën.
Ky festival, themeluar nga tenori kosovar me famë ndërkombëtare Ramë Lahaj, është shndërruar në një nga ngjarjet më të rëndësishme kulturore në vend, duke krijuar ura mes Kosovës dhe skenës ndërkombëtare operistike. Përmes këtij edicioni, organizatorët përsërisin thirrjen për ndërtimin e një shtëpie të operës në Kosovë, jo si luks, por si nevojë jetike për zhvillimin artistik dhe shoqëror të vendit.
“Pavarësisht mungesës së infrastrukturës, festivali ka transformuar çdo hapësirë të hapur në një skenë të denjë për artistët dhe publikun, duke dëshmuar se një vizion i fortë mund të kapërcejë çdo pengesë fizike”, thuhet në njoftimin zyrtar.
Mundesh me e lexu edhe…
RLIOF mbetet shembull i fuqisë së artit për të bashkuar njerëz nga kultura të ndryshme. Duke sjellë në Kosovë artistë të nivelit të lartë nga e gjithë bota, festivali jo vetëm që ofron spektakle të jashtëzakonshme për publikun, por edhe krijon mundësi të rralla për artistët e rinj vendorë, duke nxitur edukimin, bashkëpunimin dhe shkëmbimin ndërkombëtar.
“Duke qenë një gjuhë universale, Opera bashkon, ngjall shpresë dhe promovon mirëkuptim. Përmes këtij misioni, RLIOF vazhdon të mbjellë ëndrra e të ngrejë zërin për një të ardhme ku Kosova do të ketë shtëpinë e saj të operës,” – shtohet në njoftim.
Programi i RLIOF 2025:
23 korrik, 20:30 – Prishtinë
“Nexhmije Pagarusha” – Hapësira e jashtme e Bibliotekës Kombëtare
24 korrik, 20:00 – Pejë
“Nexhmije Pagarusha” – American Retail Park (Interex)
25 korrik, 20:00 – Mitrovicë
“Nexhmije Pagarusha” – Pika kryesore e Interex
27 korrik
“Educating the audience of the future” – aktivitet edukativ për publikun e ri
28 korrik, 20:30 – Prishtinë
“Opera Night” – Hapësira e jashtme e Bibliotekës Kombëtare
29 korrik, 20:30 – Prishtinë
“New Generation” – Universiteti i Arteve
30 korrik, 20:30 – Prishtinë
“Ensemble Evening” – Hapësira e jashtme e Bibliotekës Kombëtare
2 gusht, 20:30 – Prishtinë
“Gala Night – Rame Lahaj & Friends” – Sheshi Skënderbeu
RLIOF 2025 premton të sjellë jo vetëm performanca të jashtëzakonshme, por edhe të fuqizojë më tej pozicionin e Kosovës si një pikëtakim i talenteve të mëdha të muzikës klasike në rajon dhe më gjerë.
Në mungesë të mureve, opera gjen jetën e saj në sheshe, biblioteka, universitete dhe zemrat e publikut – duke provuar se arti, kur është i vërtetë, nuk njeh kufij. /Katror.info
