Njohja e fundit që ka pranuar Kosova është nga Kenia. Megjithatë, nota verbale e njohjes si dokument fizik nuk është dorëzuar ende te Presidentja e Kosovës, Vjosa Osmani, e cila pretendohet ta ketë deleguar ish-ministrin e Jashtëm Behgjet Pacolli në mision lobues në këtë shtet të rëndësishëm të Afrikës Lindore.
Dorëzimi i notes verbale pritet të ndodhë tek të hënën, më 07.04.2025. Kështu tha për KALLXO.com në një përgjigje të shkurtër, këshilltari i Behgjet Pacollit, Jetlir Zyberaj i cili ka qenë i pranishëm në Kenia kur ka ndodhur ceremonia e njohjes, më 26.03.2025.
Në lidhje me noten verbale, KALLXO.com e ka pyetur edhe Presidencën e Kosovës, por nuk ka marrë përgjigje deri në publikimin e këtij artikulli.
Mundesh me e lexu edhe...
Ndërkaq, edhe pse ka kaluar më shumë se një javë që është bërë publike njohja nga ky shtet, kjo njohje ende nuk figuron në listën e shteteve njohëse të Pavarësisë së Kosovës, e cila përditësohet nga Ministria e Punëve të Jashtme dhe Diasporës.
Në MPJD nuk janë përgjigjur rreth kësaj çështjeje.
Lajmi për njohjen nga Kenia ishte bërë i ditur më 26.03.2025.
“17 vjet pas pavarësisë, në një ceremoni të jashtëzakonshme e të paharrueshme, Republika e Kenias – një nga shtetet më të rëndësishme të Afrikës – e njohu zyrtarisht Republikën e Kosovës si shtet të pavarur dhe sovran!” – kishte njoftuar Pacolli në Facebook.
Presidentja Osmani ka thënë se kjo njohje është një dëshmi e mbështetjes së vazhdueshme për të drejtën e popullit të Kosovës për liri, pavarësi, sovranitet dhe integritet territorial.
“Republika e Kosovës mirëpret Vendimin e Republikës së Kenias për ta njohur Kosovën si shtet të pavarur dhe sovran, nëpërmjet Vendimit të nënshkruar nga presidenti Ruto, të dërguar zyrtarisht pak më parë në Presidencë” – ishte shprehur Osmani në Facebook, më 26.03.2025.
Osmani ka thënë se kjo njohje është një dëshmi e mbështetjes së vazhdueshme për të drejtën e popullit të Kosovës për liri, pavarësi, sovranitet dhe integritet territorial.
Ajo falënderoi për angazhim të vazhdueshëm ish-Presidentin dhe ish-ministrin e Punëve të Jashtme të Kosovës, Behgjet Pacollin.
Kryeministri Albin Kurti kishte shprehur mirënjohje për presidentin e Kenias, William Samoei Ruto, për çka thot se bëri një hap historik drejt afrimit të Kenias me Republikën e Kosovës dhe hapjes së rrugës për ndërtimin e marrëdhënieve diplomatike mes dy shteteve tona.
“Me vullnet e gatishmëri për bashkëpunim e partneritet të ngushtë në këtë kapitull të parë të marrëdhënieve me Kenian, që urojmë të jetë jetëgjatë, i frytshëm dhe produktiv”- ka shkruar Kurti më 26.03.2025.
Përmes një njoftimi në rrjetin social X, Ministria e Punëve të Jashtme e Kenias kishte njoftuar se në ceremoninë e nënshkrimit të njohjes Behgjet Pacolli ka qenë si i deleguar i presidentes Osmani.
“Kenia e ka njohur Kosovën në interes të paqes dhe sigurisë ndërkombëtare, integritetit territorial dhe në avancimin e forcimit të marrëdhënieve me vendet e Ballkanit. Në këtë drejtim, Presidenti William Ruto, sot u takua me Behgjet Pacollin, të dërguarin special të presidentes së Kosovës, Vjosa Osmani, në Shtëpinë e Shtetit në Nairobi”- shkruan në njoftimin e datës 26.03.2025.
Ministria e Punëve të Jashtme dhe Diasporës kishte dalë me deklaratë pas reagimeve të shtetit të Serbisë ndaj Kenias. MPJD u shpreh se Qeveria e Serbisë ka “zbuluar fytyrën e tyre të vërtetë” – duke treguar se nuk kanë interes për normalizim të marrëdhënieve.
“Deklarata e tyre e fundit si përgjigje ndaj Vendimit sovran të Republikës së Kenias për të njohur Republikën e Kosovës vërteton se Serbia vazhdon të refuzojë të përmbushë zotimet e saj në kuadër të Dialogut për normalizimin e marrëdhënieve, të lehtësuar nga BE-ja” – thuhet në deklaratën e MPJD-së.
Presidenti i Serbisë, Aleksandar Vuçiq, tha se njohja nga Kenia mund të nxisë një trend të njohjeve të Kosovës.
Ai tha se, personalisht, do të bisedojë me udhëheqës të Afrikës Lindore për të parandaluar “përhapjen e trendit [të njohjes së Kosovës]”.
Ai, gjithashtu, paralajmëroi se në dy javët e ardhshme do të ketë tërheqje të njohjeve të pavarësisë së Kosovës nga dy vende afrikane, por nuk i specifikoi cilat pretendoi.
Kenia, e vendosur në Afrikën Lindore, është një komb me diversitet të konsiderueshëm demografik dhe kulturor. Që nga viti 2023, popullsia e saj e vlerësuar është afërsisht 55.3 milion njerëz.
Njohja e parafundit që ka pasur Kosova është ajo nga Izraeli.
Kosova dhe Izraeli kanë vendosur marrëdhënie diplomatike më 01.02.2021.
Deri më tani Kosovën e kanë njohur 118 vende. Vrulli i madh i njohjeve ka qenë menjëherë pas shpalljes së pavarësisë. Me kalimin e viteve ra edhe numri i tyre, edhe pse dy vjet pas mëvetësisë, në vitin 2010, Gjykata Ndërkombëtare e Drejtësisë konstatoi në vitin 2010 se “pavarësia e Kosovës nuk e shkel të drejtën ndërkombëtare”./Kallxo.com /Katror.info
Përgatiti:
