Në mbrëmjen finale të edicionit të pestë të festivalit “Sunny Hill”, atmosfera ka arritur kulmin me energjinë që kanë sjellë emrat më të spikatur të skenës elektronike botërore.
Pas një sërë performancash mbresëlënëse, skena “C4” në Bërnicë të Poshtme u dominua nga DJ dhe producentja koreanojugore Peggy Gou, e cila me stilin e saj të veçantë deep house, minimal trance dhe tech house, e ka futur publikun në një gjendje hipnotike. E vendosur në Berlin dhe me sukses ndërkombëtar në grafikët muzikorë, ajo solli një fund të paharrueshëm për këtë festival treditor.
Vallëzimi nuk ndalej, ndërsa beat-et dukeshin sikur buronin nga toka vetë, duke krijuar një lidhje të fuqishme mes muzikës dhe publikut që kërcente me duart lart nën qiellin e natës prishtinase.
Mundesh me e lexu edhe…
Para saj, DJ i famshëm Anyma – projekti solo i Matteo Milleri – përfshiu skenën kryesore me tingujt e tij melodik techno dhe progressive house. Performanca e tij u shoqërua me drita dinamike dhe grafikë vizual që e bënë përjetimin edhe më intensiv. Çdo beat shoqërohej me britma e duartrokitje të zjarrta nga publiku.
Netët paraprake të festivalit i dhanë skenës emra si ylli botëror Dua Lipa në natën e parë dhe këngëtari kanadez Shawn Mendes në të dytën, ndërsa në natën finale skenën e ndezën edhe DJ Stryv, producenti spanjoll MYGAL dhe Tommy Gold, duke e kthyer këtë edicion në një nga më të fuqishmit deri më sot.
“Sunny Hill Festival” konfirmon edhe një herë statusin e tij si ngjarja më e rëndësishme muzikore në Kosovë dhe më gjerë, duke e bërë Prishtinën një kryeqytet të përkohshëm të muzikës moderne botërore./Katror.info
