Meghan Markle, dukesha e Sussexit, beson se njerëzit kanë nevojë për gjëra që u sjellin gëzim, veçanërisht në kohë të vështira ekonomike, dhe sipas saj, kjo është ajo që sjell brendi i saj i ri, “As Ever”.
Në një intervistë për “Fortune”, Meghan ka treguar se të gjitha produktet e brendit janë të prodhuara në SHBA, ndaj nuk preken nga tarifat doganore të presidentit Donald Trump për importet.
“Aktualisht, të gjitha produktet tona prodhohen në SHBA, kështu që nuk presim që tarifat të na prekin drejtpërdrejt. Por kur e sheh më gjerë, dhe si do ta prekin këto çështje konsumatorin çdo ditë, jam shumë mirënjohëse që e kam menduar këtë që në fillim të brendit”, ka thënë ajo.
Mundesh me e lexu edhe...
Me një ofertë që përfshin reçel, çaj dhe produkte të tjera të stilit të jetesës, Meghan ka theksuar se shumica e artikujve të saj kushtojnë më pak se 20 dollarë.
“Gjatë çdo recesioni, njerëzit sërish kërkojnë rehati. Diçka që i bën të ndihen mirë. Ky brend është ndërtuar për të ofruar atë ndjesi, bukuri dhe qasshmëri, pa çmime të kripura”, ka thënë dukesha.
Ish-aktorja e serilait “Suits”, ka thënë se gjithmonë ka pasur pasion për kombinimin e stilit të saj personal, përmes veshjeve që duken luksoze, por që në të vërtetë janë të përballueshme, transmeton Koha.net.
“Gjithmonë më kanë pëlqyer gjërat që duken bukur, por që nuk të zbrazin kuletën. Mendoj se ka një lidhje të qartë mes stilit tim personal dhe filozofisë së këtij brendi”, ka thënë ish-aktorja.
Kjo nuk është përvoja e saj e parë me biznesin. Meghan ka kujtuar se nisja e saj në sipërmarrje filloi që në moshën 11-vjeçare, kur bënte lidhëse për flokë me makinën qepëse në shtëpi dhe i shiste në lagje.
Krahas brendit “As Ever”, Meghan ka lansuar këtë javë edhe podcastin e saj të ri: “Confessions of a Female Founder”, ku ndan përvojat e saj në kohë reale.
“Jam duke folur për çfarë po kaloj, teksa po e kaloj. Jo me reflektim pasi gjithçka ka kaluar, por në moment. Edhe pse është sfiduese për shkak të orarit, ndihet si mënyra më e sinqertë për të treguar historinë”, ka thënë dukesha.
Ajo shpreson që ky podcast do ta ndihmojë audiencën ta njohë më mirë versionin real të personalitetit të saj.
“Kur njerëzit ndihen rehat, sikur janë me ty në një bisedë të zakonshme, atëherë ndodh ndikimi i vërtetë”, ka thënë ndër të tjera ajo. /Katror.info
Përgatiti:
