Kalimi në “modalitetin avion”, fikja e pajisjeve, shkëputja totale nga interneti. Rikthimi te natyra, përqafimi i pemëve, meditimi me dritaret hapur. Mësimi për të ndier frymëmarrjen që shëron ose, pse jo, arratisja imagjinare drejt një ishulli pa Wi-Fi (ashtu si në The White Lotus 3) për të shpëtuar shëndetin tonë – dhe atë të syve tanë.
Në fakt, një metodë që funksionon vërtet ekziston: quhet metoda 20-20-20. Është e thjeshtë, inteligjente dhe efektive. Dhe mbi të gjitha: mund të zbatohet edhe teksa pret që kolegu të përgjigjet në Whatsapp. Nuk ka të bëjë me yoga për sytë, as me zhytje në pishinat termale më të afërta. Është një truk i vogël për të kaluar kohën në mënyrë të ndërgjegjshme dhe për të lehtësuar tensionin që shkaktohet në sy nga monitorët dhe ekranet digjitale.
Çfarë është metoda 20-20-20?
Shumë më e lehtë nga sa mendon: çdo 20 minuta, bëj një pushim prej 20 sekondash, dhe shiko një objekt që ndodhet rreth 6 metra larg (pra 20 këmbë – nga këtu vjen edhe emri).
Mundesh me e lexu edhe…
Ka kaq shumë përfitime në një gjest kaq të vogël! Sipas profesoreshës Daniela Oehring nga Universiteti i Plymouth, kjo praktikë ndihmon në relaksimin e muskujve të syrit, parandalon tharjen e syve, mjegullimin e shikimit dhe ul rrezikun që në fund të ditës të kërkosh në Google: “pse po shoh gjërat dyfish?”.
Në fakt, edhe praktikat e urtëve tibetianë përfshijnë ushtrime që fokusojnë vështrimin dhe qetësojnë muskujt e syve. Këtë fenomen e quajmë “lodhje digjitale e syve”, dhe nuk është aspak një term i ekzagjeruar: nëse ndien sytë që djegin, kapakë të rënduar, dhimbje koke dhe një dëshirë të papërmbajtshme për ta mbyllur laptopin me një gjest dramatik — ndoshta je një nga shumë viktimat e tij.
Madje, sot ekzistojnë manuale të tëra ku këshillohet edhe “të mos harrosh të hapësh dhe mbyllësh sytë” (sepse para ekraneve, ne praktikisht harrojmë të pulitim sytë!).
Si ta optimizosh ritualin 20-20-20?
Për ta bërë metodën edhe më të këndshme, ktheje në një ritual të vogël “mindful chic”:
Gjatë pushimit 20-sekondësh, shiko diçka të bukur — një lule në tavolinë, një poster japonez, ose thjesht qiellin (edhe ai gri ka hijeshinë e vet).
Nëse dëshiron një version më të avancuar, shoqëroje me një filxhan çaj jeshil me aromë jasemini dhe një muzikë të lehtë medituese. Voilà: një pushim i vogël spa për sytë dhe mendjen.
Disa këshilla për një mjedis pune më të shëndetshëm:
Ekrani duhet të jetë në distancë të një krahu dhe pak më poshtë nivelit të syve.
Karrigia duhet të jetë aq e rehatshme sa të ndihesh si në një përqafim të ngrohtë.
Ndriçimi? I butë, i ngrohtë dhe i drejtuar mirë.
Një lagështues dhe pastrues ajri janë kthyer në aksesorë të domosdoshëm për mirëqenie të plotë në ambientet e punës.
Ekranet nuk do të fiken, por ndërgjegjësimi ynë duhet të qëndrojë i ndezur.
Nuk ke nevojë të çinstalosh Instagram-in ose të bësh ndonjë betim për largim total nga rrjetet sociale.
Mjafton që çdo 20 minuta të ndalesh, të marrësh frymë dhe të kujtosh se përtej çdo feed-i ka një botë reale që pret të shihet me sytë tanë të shëndetshëm./Living.al
Përgatiti:
