I nisur rreth 3 dekada më parë, manifestimi “Mirë se vini në Alpet shqiptare” në Vuthaj të Plavës e Gucisë, edhe këtë vit mblodhi shqiptarë nga të gjitha trevat etnike dhe mërgata.
Këtu është vendi që na bën krenar, ku takojmë miq, shokë e të afërm prandaj kemi ardhur me dëshirë të madhe t’i ndajmë këto momente të paharrueshme, thanë disa prej pjesëmarrësve të këtij manifestimi kulturor.
“Ky është një tubim që ka filluar rreth tash e 3 dekada. Ky vend ka pas ardhë në një pikë ku s’ka pasë ku shkon më poshtë. Seriozisht kemi menduar se po vdes krejt, por vitet e fundit kanë treguar se ky vend ka filluar me u ngjallë, sidomos prej këtyre banorëve të Vuthajve. Ka njerëz që s’i kemi parë për sa kohë dhe është vendi ku i takojmë më së shumti mërgimtarët edhe vendasit”, ka thënë Fadil Prelvukaj nga Plavë e Gucisë.
Mundesh me e lexu edhe...
“Ky vend me tubimin e vet tradicional po na bënë krenar gjithë trojeve shqiptare dhe po na tregon se si ne duhet ta kultivojmë kulturën ashtu si në dy shtetet tona politike edhe në trevat tjera që janë jashtë shteteve politike. Në qoftëse, ne, si popull arrijmë të ndërtojmë një kulturë të përbashkët, një integrim kulturor, një integrim ekonomik, ne ja kemi arritur qëllimit”, tha Blerim Muriqi nga Kosova.
“Jam për herë të parë në këtë trevë shqiptare, jam jashtëzakonisht i lumtur, një ndjenjë e mirë në këtë manifestim të mirë. Uroj që këtyre trevave t’u kthehet dinjiteti i mëhershëm, shqiptarët kudo që janë të kthehen në këtë trevë, në këto vise. Dhashtë Zoti sa më parë u bashkofshim”, tha Agron Gërvalla për RTK.
Në kuadër të programit kulturor artistik, në manifestimin tradicional “Mirë se vini në Alpet shqiptare” në Vuthaj marshuan shumë grupe dhe ansamble folklorike që me paraqitjen e tyre e begatuan edhe më shumë këtë organizim./Katror.info
