Vitin e kaluar me të parin edicion e kishte kaluar testin suksesshëm. Tani me të dytin edicion, “Mitrovica International Jazz Days” tregon synime ambicioze tek ofron aktivitete edhe për fëmijët e të rinjtë. “Jemi përpjekur që në edicionin e dytë, ‘MIJD’ t’i falë më shumë Mitrovicës”, ka thënë Rona Nishliu, drejtoreshë e festivalit.
Muzika jazz e ka adresën e vet e cila mbledh të gjithë entuziastët e këtij zhanri. Gjatë vlugut të verës, atëherë kur aktivitetet kulturore harlisen kudo nëpër vend, “Mitrovica International Jazz Days” është ajo që e kthen vëmendjen e merituar, së paku për disa ditë, kah qyteti i lumit Ibër, shkruan Koha.net
Nga 22 deri më 24 gusht, tashmë është bërë e ditur se aty do të shpalosen ditët e jazzit, por mbi të gjitha nuk do të mjaftohet vetëm me aq. Pas edicionit gjatë vitit të kaluar, sivjet MIJD, pasi e “kaloi” suksesshëm testin e të parës herë, vjen sërish me qasje unike sa u përket festivaleve të llojit të vet, sjell emra të njohur ndërkombëtarë të muzikës jazz në Kosovë, por mbi të gjitha, aktivitetet jashtë performancave janë ato që përbëjnë veçanti edhe më të madhe, janë tregues i vetë misionit të tij. Në të parin edicion, në qytetin e Mitrovicës kishin zbarkuar emra të mëdhenj të muzikës të cilëve rrugëtimi u ishte shkruar edhe në skena famëlarta si ajo e “Grammy”.
Mundesh me e lexu edhe…
Bas-kitaristi e këngëtari me prejardhje afrikane, Richard Bona, kishte ngjitur skenën e festivalit, duke e bërë dhe hapjen e atij edicioni. Fituesi i çmimit “Grammy” ishte pritur me ngrohtësi nga publiku mitrovicas. Por ai nuk kishte qenë i vetmi pjesëmarrës i këtij kalibri. Laureatët e pesëfishtë të “Grammyt” që performuan në “Mitrovica International Jazz Days” ishin dhe britaniku, Bill Laurance, e amerikani Michael League, që të dy kompozitorë, producentë dhe poli-instrumentistë. Me pak fjalë ajo çfarë ishte arritur me një edicion të parë të kësaj iniciative kishte qenë një shfaqje ambiciesh e serioziteti, e cila u përkthye në sukses. Të njëjtin avaz premton edhe edicioni i dytë, e tashmë i dëshmuar me kapacitetet e tij.
Numërimi mbrapsht ka filluar për pikëtakimin në skenën e këtij festivali në Sheshin Isa Boletini. Këtë edicion skena e “MIJD” do të shërbejë si altoparlant për zëra grash, muzikantesh e yjesh ndërkombëtare që i përkasin këtij zhanri muzikor. Deri tani është bërë i ditur njëri nga emrat që do të interpretojnë. Bëhet fjalë për artisten Kinga Glyk nga Polonia. Por itinerarin e këtij dyditëshi padyshim që do ta përshkojnë edhe seria e performancave të muzikantëve të rinj të talentuar nga Kosova e rajoni. Të rinjtë nuk do të jenë të vetmit që do të përfitojnë në kuadër të aktiviteteve të këtyre dy ditëve. Artistja Rona Nishliu , në cilësinë e drejtoreshës së festivalit ka thënë se “MIJD 2024” synon që kontributin për qytetin e vetë “shtëpi” ta zgjeroj tutje.
“Jemi përpjekur që në edicionin e dytë, ‘MIJD’ t’i falë më shumë Mitrovicës. Programi është zgjeruar, i jepet hapësirë talenteve të reja, kemi sesione të veçanta të “sound healing” si dhe sesionet e ekspozimit të fëmijëve ndaj muzikës jazz përmes lojës dhe argëtimit. Koncertet fokusohen te gratë e suksesshme në xhaz si dhe tek promovimi i gjeneratës së re të xhazistëve ndërkombëtarë. Shpresojmë se përpjekja jonë do të mirëpritet e t’i shërbejë komunitetit”, është shprehur ajo në një prononcim për KOHË-n.
Në fakt përveç dy ditëve argëtim ky event shënjestrën e vendos larg, tek synon që në qitje t’ia dalë duke arritur të frymëzojë, edukojë e të bashkojë qytetarët e vendit, me një formulë të vetme: forcën e muzikës. Mbi të gjitha, gjithçka ofrohet pa pagesë dhe e qasshme nga të gjithë.
Promovimi i kulturës, artit e muzikës duke tentuar të ketë ndikim pozitiv në komunitetin e Mitrovicës, është edhe një levë tjetër, e cila aktivizon motorin e festivalit.
“Ideja është të nxisim pjesëmarrjen aktive të të rinjve dhe të fëmijëve, duke krijuar mundësi për ta që të zhvillojnë aftësitë dhe të eksplorojnë pasionet e tyre. Si mendoni që i kontribuon qytetit të Mitrovicës kjo ngjarje? Kjo ngjarje kontribuon në shumë mënyra në qytetin e Mitrovicës. Së pari, ajo sjell një energji pozitive dhe një ndjenjë bashkëpunimi në komunitet. Duke përfshirë aktivitete për të gjitha moshat, festivali krijon një ambient të përbashkët ku qytetarët mund të ndërveprojnë dhe të ndajnë përvoja të përbashkëta. Në nivel nacional, është programi më prestigjioz i ofruar ndonjëherë në sektorin e muzikës xhaz dhe world music, si dhe një program konkurrues në nivel rajonal”, ka thënë Nishliu, duke iu referuar këtij festivali si programi më prestigjioz i ofruar ndonjëherë në sektorin e muzikës xhaz dhe world music, si dhe një program konkurrues në nivel rajonal. /Katror.info
Përgatiti:
