Ngjarja unike dedikuar muzikës jazz “Mitrovica International Jazz Days”, sot fillon edicionin e tretë, duke sjellur figura të shquara.
Festivali nis me dyshen Elina Duni dhe Rob Luft në ora 20:00 në qendrën kulturore “Rexhep Mitrovica” në Mitrovicë.
Këtë edicion, festivali do zhvendoset edhe në Prishtinë. Një ditë më pas, në Amfiteatrin e Bibliotekës Universitare do të interpretojë Aziza Mustafa Zadeh nga Azerbajxhani.
Mundesh me e lexu edhe…
Nuk i janë dashur më shumë se dy edicione që të zgjerohet e të zërë vend edhe në hartën globale të jazzit e t’u bashkohet edhe kauzave të mëdha. Sivjet, pos programit të pasur, festivali i bashkohet festës për “Muajin e Jazzit” si dhe vjen me një risi – anëtarësimin në rrjetin ndërkombëtar “Green Touring Network”.
“Ky anëtarësim do të sjellë shumë përfitime për MIJD, rritje të prezencës dhe vizibilitetit në nivel ndërkombëtar, mundësi të reja bashkëpunimi, dhe më kryesorja vendosja e Mitrovicës dhe Kosovës në hartën globale të jazzit me një lajm pozitiv dhe frymëzues”, ka thënë drejtoresha e MIJD-së, Rona Nishliu
Ngjarja unike dedikuar muzikës jazz “Mitrovica International Jazz Days” është relativisht e re në skenën vendore muzikore, por me edicionin e tretë sjell figura të shquara. E ka bërë që me edicionin e parë me sjelljen e ikonës, Richard Bona dhe jo vetëm. Sivjet, pos programit të pasur, festivali i bashkohet festës për “Muajin e Jazzit” si dhe vjen me një risi – anëtarësimin në rrjetin ndërkombëtar “Green Touring Network”.
Që me edicionin e parë, festivali veçse ka kapur audiencën, ka bërë jehonën e tij dhe ka arritur që në qytetin verior të Kosovës të sjellë emra të skenave të mëdha të botës së jazzit. Këtë e bën edhe sivjet.
Drejtoresha e festivalit, Rona Nishliu, ka thënë se kjo seri koncertesh vjen për të shënuar iniciativën globale të UNESCO-s me të cilën prilli është shpallur “Muaji i Jazzit”, 13 vjet më parë. Më 1 maj do të interpretojnë “Nils Kugelmann Trio” nga Gjermania, edhe ky koncert i paralajmëruar për t’u mbajtur në Shtëpinë e Kulturës.
“Në këtë kontekst, MIJD 2025 hap programin në Mitrovicë me një duo të jashtëzakonshme: Elina Duni & Rob Luft – artistë me famë ndërkombëtare, që do të performojnë më 29 prill në qendrën kulturore ‘Rexhep Mitrovica’. Në Ditën Ndërkombëtare të Jazzit – 30 prill, në Prishtinë, sjellim një emër legjendar: Aziza Mustafa Zadeh (Azerbajxhan) – një ikonë e jazzit botëror, me një stil të pakrahasueshëm që bashkon lindjen dhe perëndimin”, ka thënë Nishliu në një përgjigje për KOHËN.
Këtë edicion koncertet do të jenë me biletë. Sipas festivalit, ky është “hap i rëndësishëm për të ruajtur cilësinë dhe qëndrueshmërinë e festivalit”. Mbështetja për festivalin përmes blerjes së biletave konsiderohet thelbësore pasi ndihmon mbajtjen gjallë të një “festivali të lirë, të hapur dhe të qëndrueshëm për të gjithë”.
Në edicionin e kaluar sigurimi i hapësirës për mbajtjen e koncerteve qe sfidë. Shtëpia e Kulturës në Mitrovicë qe në renovim ndërsa për ta vendosur skenën në sheshin “Isa Boletini”, siç patën njoftuar organizatorët, jo lehtë u sigurua leja nga Komuna. Nishliu ka thënë se detajet rreth kësaj çështje do të përditësohen.
“Vitin e kaluar, sigurimi i hapësirës për mbajtjen e festivalit ishte një nga sfidat më të mëdha. Megjithatë, aty ku u zhvendosëm, gjetëm një përkrahje të jashtëzakonshme nga qytetarët – jo vetëm të Mitrovicës, por nga e gjithë Kosova. Për edicionin e tretë dhe lokacionin e tij, do të ndajmë shumë shpejt detajet – por mund t’ju premtojmë se jemi duke përgatitur një atmosferë të denjë për jazzin që e duam”, ka thënë Nishliu në përgjigjen e saj.
Pos programit qendror të Festivalit, organizatorët vënë theksin edhe në aspektin edukativ muzikor.
Rona Nishliu ka njoftuar se edhe sivjet do të vazhdojnë aktivitete të tilla.
“Në shkurt të këtij viti, mbajtëm një punëtori të suksesshme me trumpetistin e njohur bullgar Mihail Yossifov, që mblodhi muzikantë të rinj nga e gjithë Kosova në Mitrovicën e Veriut, konkretisht në degën veriore të ‘Mitrovica Rock School’ që ka qenë një bashkëpunëtor i vazhdueshëm dhe tejet i rëndësishëm i MIJD qysh nga dita e parë. Edukimi dhe zhvillimi i talenteve të reja është një shtyllë kyçe e festivalit. Edicioni i tretë do të sjellë aktivitete të reja edukative, që do të shpallen shumë shpejt”, ka paralajmëruar ajo.
Edicioni i tretë që sivjet vjen me po aq koncerte, zhvillohet duke qenë pjesë e “Green Touring Network”, rrjet ndërkombëtar që promovon praktikat e qëndrueshme për mjedisin. “Rritje madhore” e konsideron këtë Nishliu për një festival me dy vjet në skenë.
“Të jesh pjesë e një rrjeti global krah emrave më të mëdhenj të industrisë, dhe me një tematikë kaq jetike si përgjegjësia ndaj planetit, është vërtet domethënëse”, është shprehur ajo duke shpjeguar dobitë që i sjell Festivalit kjo anëtarësi.
“Ky anëtarësim do të sjellë shumë përfitime për MIJD, rritje të prezencës dhe vizibilitetit në nivel ndërkombëtar, mundësi të reja bashkëpunimi, dhe më kryesorja vendosja e Mitrovicës dhe Kosovës në hartën globale të jazzit me një lajm pozitiv dhe frymëzues. Kjo është gjithashtu një dritare e re për zhvillimin e sektorit të jazzit në Kosovë, dhe një hap i rëndësishëm për lëvizjen e muzikantëve tanë drejt skenave ndërkombëtare”, ka thënë Nishliu.
Sipas prezantimit, “Green Touring Network” funksionon që nga viti 2020 dhe synon rritjen e muzikës dhe entuziastët e mjedisit si dhe inkurajon industrinë e muzikës që të kontribuojë në mbrojtjen e mjedisit.
“Ne duam të iniciojmë një ndryshim pozitiv dhe të orientuar drejt së ardhmes në industrinë e muzikës. Ne duam të ndryshojmë në mënyrë aktive gjërat dhe të frymëzojmë këtë industri me ide të reja dhe të qëndrueshme. Këtu duam të fillojmë dhe të informojmë e këshillojmë artistët, t’i mbështesim ata në zbatimin e ndryshimeve dhe të nisim fushata si kjo me komunitetin në rritje të turneut të gjelbër”, shkruhet në prezantimin e rrjetit “Green Touring Network”.
Nishliu ka bërë të ditur se do të marrë pjesë në një punëtori të rrjetit “Green…”, por se nuk përjashtohet mundësia për të qenë pjesë e një shtandi duke e ndarë atë me ndonjë prej atyre që prezantojnë punën e tyre në panair.
“’Mitrovica International Jazz Days’ do të jetë i pranishëm në edicionin e sivjetshëm të ‘Jazzahead!’. Festivali ynë do të marrë pjesë në punëtoritë zyrtare të ‘Green Touring Network’, si pjesë e anëtarësimit tonë të ri në këtë rrjet të rëndësishëm për lëvizjen e qëndrueshme artistike. Gjithashtu, kemi marrë ftesa zyrtare për të qenë pjesë e pritjeve pranë stendave të disa shteteve, përfshirë stendën e Gjermanisë, Luksemburgut, përfaqësues të stendës amerikane dhe shumë të tjerë nga rrjeti global i jazzit”, ka thënë ajo.
Ka vlerësuar se këto arritje “tregojnë potencialin dhe seriozitetin me të cilin MIJD po ndërton të ardhmen e vet dhe të komunitetit artistik lokal e rajonal”.
Që në edicionin e parë, në qytetin e Mitrovicës kishin zbarkuar emra të mëdhenj të muzikës që shkojnë deri tek ata të vlerësuar me “Grammy”. Bas-kitaristi e këngëtari me prejardhje afrikane, Richard Bona, kishte ngjitur skenën e festivalit, duke e bërë dhe hapjen e atij edicioni. Laureatët e pesëfishtë të “Grammyt” që performuan në “Mitrovica International Jazz Days” ishin dhe britaniku Bill Laurance, e amerikani Michael League, të dy kompozitorë, producentë dhe poli-instrumentistë.
Edicioni i dytë, vitin e kaluar, që qe zhvilluar prej 22 deri më 24 gusht, pati sjellë performancën e mahnitshme me shkathtësitë e jashtëzakonshme të jazz kantautores suedeze, Gunhild Carling, këngëtaren e kompozitoren boshnjako-sllovene Mirna Bogdanoviq, Kinga Glyk nga Polonia, “Francesca Tandoi Trio” e “Western Balkans Band”.
Me tri koncerte sivjet, “Mitrovica International Jazz Days” e vazhdon traditën e jazzit me një tjetër rrëfim unik me zhanrin unik muzikor. /Koha.net /Katror.info
Përgatiti:
