Festivali i njohur Mitrovica International Jazz Days (MIJD) po rikthehet këtë vit, duke u zhvilluar nga data 8 deri më 10 gusht 2025. Për tre ditë me radhë, qyteti do të mbushet me tinguj të mrekullueshëm të muzikës xhaz dhe performanca të shkëlqyera nga artistë vendorë e ndërkombëtarë, raporton Katror.info.
Me moton #MitroLove, ky festival vazhdon misionin e tij për të promovuar muzikën cilësore dhe për të fuqizuar të rinjtë dhe gratë në skenën lokale dhe atë ndërkombëtare të xhazit. Festivali i sjell në Mitrovicë artistë me emra të njohur dhe gjithashtu hap dyert për muzikantët e rinj që dëshirojnë të bëhen pjesë e tij.
Një veçori e veçantë e këtij edicioni është thirrja për aplikim për muzikantë të rinj në moshën 18-30 vjeç, që luajnë jo vetëm jazz, por edhe rock, alternative, hip-hop, punk, metal, new wave, fusion, pop dhe zhanre të tjera moderne.
Mundesh me e lexu edhe…
Të talentuarit mund të aplikojnë si solistë ose grupe deri në pesë muzikantë për të performuar në skenat alternative të festivalit. Afati për aplikime mbyllet më 25 korrik 2025.
Në pranverë, Mitrovica International Jazz Days prezantoi me sukses Serinë e Muajit të Xhazit, duke sjellë në skenë emra të njohur si Aziza Mustafa Zadeh, Elina Duni dhe Nils Kugelmann Trio. Këto ngjarje u mbështetën edhe nga stenda gjermane në panairin më të madh të xhazit në Europë, JazzAhead.
Mitrovica fton të gjithë adhuruesit e muzikës të bashkohen në këtë festë të muzikës dhe kulturës, duke ndarë së bashku dashurinë për xhazin dhe artin./Katror.info
