Mjekët shqiptarë të Zvicrës janë të organizuar në njërën ndër shoqatat që shquhen më së shumti për aktivitetin e tyre në komunitet. Ndonëse përpjekjet për organizim të mjekëve tanë në Zvicër ishin më të hershme, Lidhja e Mjekëve Shqiptarë të Zvicrës (LMSHZ) u krijua në vitin 2018 dhe që atëherë zhvillon një aktivitet të dendur.
Albinfo.ch prezanton profilin e LMSHZ-së, me të dhëna të hollësishme mbi themelimin, misionin, aktivitetet, sukseset dhe synimet e saj për të ardhmen.
Lidhja e Mjekëve Shqiptarë në Zvicër u themelua më 24 nëntor 2018, si një përgjigje ndaj nevojës së kamotshme për krijimin e një platforme të përbashkët që forcon lidhjet ndërprofesionale dhe shoqërore të mjekëve shqiptarë që jetojnë dhe veprojnë në Zvicër.
Mundesh me e lexu edhe…
Ne së pari zhvilluam dy takime shoqërore njohëse në Lucern dhe Winterthur. Mandej, gjashtë muaj para themelimit zyrtar të LMSHZ-së, më 24 qershor 2018 në Bernë u mbajt Kuvendi Nismëtar, kuvend ky i cili shënon fillimet e projektit tonë të përbashkët. Kryetar i parë i LMSHZ-së ishte Prof. Dr. med. Dr. h. c. Omer Dzemali ndërsa në mandatin e dytë, Prof. Dr. med. Florim Cuculi.
Kryesia e tanishme është në këtë përbërje: Dr. med. Mentor Bilali kryetar, Dr. med. Valbone Hysenaj Miftari nënkryetare, Dr. med. Bujana Batusha Sopi sekretare e përgjithshme, Med. dent. Alban Zeqiri arkatar, si dhe M.sc. med dent. Gazmend Haliti, Prof. Dr. et phil. Alban Neziri dhe Dr. med. Naim Mehmeti, anëtarë të kryesisë. LSHMZ ka rreth 100 anëtarë aktivë.
Misioni dhe vizioni
Misioni dhe vizioni i organizatës sonë është përfaqësimi i mirëfilltë dhe mbështetja e vazhdueshme e anëtarëve duke iu përgjigjur nevojave qoftë individuale apo të përgjithshme. Pastaj vendosja e urave të bashkëpunimit ndërmjet të gjithë mjekëve shqiptarë në Zvicër e më gjerë, për të ndikuar kështu në përmirësimin e shëndetit të komunitetit tonë, promovimi i hulumtimeve të ndryshme shkencore, gjegjësisht të arriturave profesionale të mjekëve shqiptarë etj. Më gjerësisht në webfaqen e LMSHZ-së: www.swissalbmed.ch.
Fushat e aktivitetit
Ne jemi aktivë në të gjitha shtyllat kyçe të misionit tonë duke krijuar lidhjet përmes takimeve, simpoziumeve dhe platformave të komunikimit dhe duke mundësuar kështu shkëmbim përvojash dhe bashkëpunim në projekte të përbashkëta. Pastaj, duke organizuar simpoziume, ligjërata dhe sebinare me ekspertë nga fusha të ndryshme të mjekësisë, me qëllim ngritjen e njohurive dhe aftësive profesionale të anëtarëve tanë. Ne jemi të angazhuar në ndërtimin e partneriteteve me institucione vendore dhe ndërkombëtare, si dhe organizata të tjera relevante, për të përfaqësuar interesat e mjekëve shqiptarë në mënyrë të denjë dhe efektive.
Projektet më të rëndësishme të realizuara
Swiss Medical School në Prishtinë (4–5 nëntor 2022), i mbajtur në Hotel Emerald, ishte një projekt shumë me rëndësi. Ngjarja u dallua për ligjëratat me nivel të lartë profesional dhe workshopet praktike nga anëtarët e LMSHZ-së, që zgjuan interes të madh tek mjekët e rinj dhe studentët e Fakultetit të Mjekësisë në Prishtinë. Po kështu, këtu hyn edhe organizimi i simpoziumeve vjetore shkencore në Zvicër, që çdo herë kanë qenë të akredituara nga institucionet shkencore të shtetit zviceran, bashkëpunimi institucional me FMH dhe MEBEKO për njohjen e diplomave për mjekët që vijnë nga vendet e origjinës. Këtu vlen të përmendet përkushtimi i tre anëtarëve të kryesisë Prof. Dr. med. Dr. h. c. Omer Dzemalit, tashmë kryetar nderi i LMSHZ-së, Dr. med. Afrore Suka Qorollit dhe Dr. med. Valbone Hysenaj Miftarit, të cilët së bashku me përfaqësues të shoqatës MEDENS shoqatë kjo e përbërë nga shumë mjekë e mjeke nga vendet jashtë EU-së morën pjesë në negociatat me autoritetet arsimore zvicerane FMH dhe Mebeko duke kontribuar në revizionin e nenit 69 të WBO (rregullores së trajnimit të mëtutjeshëm) me ç’ rast u liruan nga provimi shtetëror të gjithë ata që kishin filluar punën në Zvicër para vitit 2010 dhe që i plotësonin kriteret për t’iu nënshtruar provimit specialistik.
Mbështetja e mjekëve të porsaardhur
Një ndër zotimet e Lidhjes së Mjekëve Shqiptarë në Zvicër nga fillimi ka qenë dalja në ndihmë me informacione gjithsecilit që ka interes të ushtrojë profesionin mjekësor në Zvicër. Kështu që, që në fillim të aktiviteteve tona si kryesi Dr. med. Valbone Miftari Hysenaj ka marrë përsipër përpilimin e Doracakut me të dhënat e përgjithshme mbi dispozitat ligjore, që rregullojnë ushtrimin e profesioneve mjekësore në Zvicër për shtetasit e vendeve jashtë BE/EFTA. Krijimi i një baze të dhënash të të gjithë mjekëve shqiptarë në Zvicër, që ndihmon në ndërlidhjen më të lehtë të komunitetit dhe në ndërtimin e një rrjeti të fortë bashkëpunimi është një objektiv tjetër i kryesisë së LMSHZ-së.
Sfidat
Në realizimin e misionit tonë si Lidhje e Mjekëve Shqiptarë në Zvicër, përballemi me sfida të ndryshme dhe të vazhdueshme, gjë e cila kërkon angazhim të përhershëm. Si një organizatë vullnetare dhe jo-fitimprurëse, përballemi me kufizime në kapacitetet organizative dhe buxhetore për të realizuar projekte më të mëdha e më të strukturuara.
Arritjet
Disa nga momentet më përfaqësuese të rrugëtimit tonë të sukseseve përfshijnë: Organizimi i gjashtë simpoziumeve vjetore shkencore. Pastaj Swiss Medical School – edicioni i parë i cili u mbajt më 4 – 5 nëntor 2022 në Prishtinë. Kjo nismë edukative na bën veçanërisht krenarë dhe aktualisht jemi në fazën përgatitore të edicionit të dytë. Seminaret me komunitetin shqiptar në Zvicër, si ai i mbajtur në janar 2025 në Zürich dhe Gjenevë, nën moton “Parandalimi shpëton jetë”, përfaqësojnë një dimension tjetër të rëndësishëm të misionit tonë, etj.
Bashkëpunimi
Nevojitet ende punë për të konsoliduar praninë tonë në tryezat vendimmarrëse dhe për të rritur ndikimin në politikat që prekin profesionistët shqiptarë në Zvicër siç është mosnjohja e diplomave universitare të vendeve të origjinës. Ndërsa sa i përket bashkëpunimit me universitetet dhe institucionet akademike në vendet tona të origjinës, ne jemi treguar gjithmonë të hapur dhe të gatshëm për ndërtimin e urave të qëndrueshme të bashkëpunimit. Një dëshmi konkrete e kësaj qasjeje është organizimi i edicionit dytë të Swiss Medical School, i cili do të mbahet më 8 dhe 9 nëntor 2025 në Prishtinë.
Gjithashtu, LMSHZ do të jetë bashkorganizatore e Kongresit të Parë Klinik të Kirurgëve Shqiptarë, i cili do të zhvillohet më 25–28 shtator 2025.
E ardhmja
Të ardhmen e Lidhjes së Mjekëve Shqiptarë në Zvicër e shohim si një proces zhvillimi të vazhdueshëm drejt një platforme edhe më të konsoliduar – si në fushën profesionale, ashtu edhe në shoqëri. Në aspektin profesional, synojmë të luajmë një rol të rëndësishëm në rritjen e Lidhjes dhe krijimin e urave të qëndrueshme me universitetet dhe spitalet në vendet e origjinës. Në raport me komunitetin shqiptar, e shohim veten si një urë të besueshme mes mjekësisë dhe qytetarëve tanë.
Mesazhi
“Mesazhi ynë për mjekët dhe profesionistët e rinj shqiptarë në Zvicër është i qartë: Rruga drejt suksesit në një sistem kompleks si ai zviceran kërkon përkushtim, durim dhe standarde të larta, por ne jemi këtu për ta lehtësuar këtë rrugëtim. Andaj ftojmë të gjithë mjekët që jetojnë në Zvicër që të bëhen pjesë e LMSHZ-së./albinfo.ch
