Interneti i shpejtë me valë sot është bërë diçka pa të cilën vështirë se mund ta imagjinojmë jetën tonë. Shumica prej nesh në shtëpitë tona kanë një lidhje interneti me konsum të pakufizuar dhe një sinjal Wi-Fi nga një ruter që lidh të gjitha pajisjet e mundshme – laptopë, tablet, celularë, televizorë…
Megjithatë, sinjali Wi-Fi ka kufizimin e vet teknik në atë që kalon dobët nëpër mure. Deri më tani këtë problem e kemi zgjidhur me pak ose aspak sukses përmes pajisjeve për amplifikimin e sinjalit, të ashtuquajturat ‘zgjatues.’
Një punim shkencor i titulluar ‘Struktura kundër reflektimit për transmetim të përsosur përmes mediave komplekse‘ u botua së fundmi në revistën Nature. Nën këtë titull të ndërlikuar, ekziston një zgjidhje e thjeshtë për problemin e disponueshmërisë së një sinjali cilësor Wi-Fi në çdo cep të shtëpisë tuaj.
Hulumtimi i kryer së bashku nga shkencëtarët e Universitetit të Teknologjisë së Vjenës dhe Universitetit të Rennes jep shpresë se së shpejti sinjali Wi-Fi do të kalojë nëpër mure të trasha pa kufizim.
Kur valët Wi-Fi kalojnë nëpër një pengesë komplekse si një mur betoni i armuar, ato reflektohen, shpërndahen, shkurtohen dhe përthithen. Ideja e ekipit austriako-francez është që të vendosen struktura të veçanta, pra veshje, në mure për të parandaluar reflektimin e valëve.
“Mund t’i mendoni si një shtresë antireflektuese në syze. Kur vendosni një shtresë shtesë në xhami, reflektimi zvogëlohet dhe valët e dritës arrijnë më mirë te syri”, thotë një nga autorët e studimit, Stefan Rother nga Universiteti i Teknologjisë në Vjenë.
Me këtë informacion mund të llogaritet se si duhet të duket një shtresë kompensimi për çdo mur që do të “anulonte” reflektimin dhe do t’i lejonte valët të kalojnë nëpër mur të pandryshuara.
“Çelësi për këtë është një metodë matematikore që mund të përdoret për të llogaritur formën e saktë të kësaj shtrese anti-reflektuese,” shton Horodinski.
Shkencëtarët e dinin tashmë se një metodë e tillë ishte teorikisht e mundur, por tani për herë të parë ata dolën me një procedurë konkrete llogaritëse dhe gjithashtu e testuan me sukses atë në eksperimente.
Autorët e studimit zbuluan se mund të përcaktohet një algoritëm për të llogaritur dispersionin e kërkuar kompensues, i cili hap mundësi jo vetëm për Wi-Fi, por edhe për përmirësimin e performancës së pajisjeve të tjera si mikroskopët dhe kamerat.
Një fushë tjetër ku mund të jetë e dobishme është gjenerata e ardhshme e komunikimit celular 6G – fuqia e nevojshme për transmetimin e sinjaleve të komunikimit celular mund të reduktohet ndjeshëm kur mund të ketë transmetim të suksesshëm nga emetuesi te marrësi pa shpërndarje dhe reflektim.
Përgatiti:
