“Muzeu Picasso”, në Paris, 40 vjet pas inaugurimit të tij, do t’i nënshtrohet një rikonstruksioni prej 50 milionë eurosh, duke zgjeruar hapësirat për ekspozita të përkohshme dhe duke riideuar kopshtin e tij deri në vitin 2030, , sipas “Le Monde”.
Muzeu “Picasso” ka njoftuar një projekt ambicioz rinovimi dhe zgjerimi të quajtur “Picasso 2030”, duke shënuar një moment të rëndësishëm ndërsa institucioni feston 40-vjetorin e tij.
Drejtoresha e muzeut, Cécile Debray, zbuloi planin gjithëpërfshirës gjatë një eventi të dielën në mbrëmje, duke theksuar se projekti synon të rivendosë pozicionin qendror të “Muzeut Picasso” në qytetin e tij të adoptuar, Parisin.
Mundesh me e lexu edhe…
Projekti përfaqëson një zgjerim të planifikuar të muzeut – të vendosur në ndërtesën historike “Hôtel Salé”.
Plani i rinovimit do të respektojë integritetin arkitektonik të rezidencës së shekullit të XVII, ndërsa do të modernizojë mjediset e saj – për t’i shërbyer më mirë vizitorëve dhe për të ekspozuar koleksionin më të madh në botë të veprave të Picasso-s.
Kostot e rinovimit do të mbulohen nga Fondacioni i Muzeut dhe trashëgimtarët e Picasso-s, duke demonstruar angazhimin e tyre për të ruajtur trashëgiminë e artistit.
Koha e njoftimit përkon me projektin e madh të rinovimit të Qendrës Pompidou, i cili është planifikuar të përfundojë deri në vitin 2030 – pas pesë vitesh punime ndërtimi.
Ky afat kohor paralel sugjeron një rinovim më të gjerë të institucioneve kryesore kulturore të Parisit, pasi të dy muzetë synojnë të përmirësojnë shërbimet e tyre për dekadën e ardhshme dhe më tej./KultPlus/Katror.info
