Qeveria e Kosovës ka miratuar Kërkesën për pagesë të 224 specializantëve me vetëfinancim, në vlerë prej 2.3 milionë euro, për periudhën 1 janar – 31 dhjetor 2025.
Miratimi i Vendimit për ndarjen e këtyre mjeteve është bërë me propozim të ministrit të Shëndetësisë, Arben Vitia, shkruan Kallxo.com
“Që të lehtësohet shkollimi i specializantëve, propozojmë pagesën e 2.3 milionëve për këta specializantë për periudhën janar-dhjetor 2025.” – deklaroi Vitia.
Mundesh me e lexu edhe…
Ai theksoi se është “punuar që të rritet numri i mjekëve” dhe se kjo masë do të ndikojë që të mbahen kuadrot shëndetësorë në Kosovë. Kjo sipas tij u mundëson edhe qytetarëve qasje më të lehtë dhe më cilësore në shërbimet shëndetësore.
Tutje, Qeveria miratoi edhe Vendimin për pagesën e 30 specializantëve nga Lugina e Preshevës dhe Mali i Zi, në shumën prej 316 mijë euro.
Kryeministri Kurti tha me këtë rast se Qeveria e Kosovës ka “përkushtim për bashkatdhetarët”.
“Mjekë tanë janë edhe bashkatdhetarët nga Lugina e Preshevës dhe Mali i Zi. Për Luginën nuk mjafton vetëm rritje e buxhetit me nga 1 milion euro vit pas viti, por po përkujdesemi që kategori e profesione të ndryshme t’i përkrahim sipas mundësive e krahas edhe nevojës. Andaj, po e vazhdojmë mbështetjen edhe për 30 specializantë që vijnë nga vendet e rajonit, në vlerë prej 316 mijë euro – duke përfshirë pra specializantët nga Lugina e Preshevës dhe Mali i Zi.” – ka deklaruar Kurti.
Ndërsa, ministri Vitia tha se shkollimi specialistik për shqiptarët nga vendet e tjera lejohet me Vendim të Ministrisë së Shëndetësisë.
“MSH ka pasur shumë takime me këta specializantë, për sfidat e tyre gjatë procesit të specializimit. Propozoj pagesën e 30 specializantëve me vetëfinancim, në shumë prej 316 mijë euro, nga data 01.01.2025 deri më 31.12.2025.” – deklaroi Vitia.
Këto Vendime u morën gjatë mbledhjes së Qeverisë së mbajtur të premten, më 31.01.2025./Katror.info
Përgatiti:
