Në qytetin Bhopal të shtetit të Madhja Pradesh në Indi, një projekt i ri i ndërtimit të një ure mbi hekurudhë është bërë objekt kritikash pas zbulimit të një kthesë të mprehtë 90-gradëshe në dizajnin e saj.
Ky projekt, i cili ka kushtuar afërsisht 2.3 milionë dollarë, kishte për qëllim të lehtësonte trafikun në zonën e Ashbagh dhe të përmirësonte lidhjet mes disa lagjeve dhe stacionit të trenit në New Bhopal. Megjithatë, kthesa e mprehtë ka ngjallur shqetësime për sigurinë e shoferëve dhe ka shkaktuar tallje në rrjetet sociale.
Në përgjigje të këtij incidenti, kryeministri i Madhja Pradesh, Mohan Yadav, ka urdhëruar një hetim të plotë mbi projektin.
Mundesh me e lexu edhe…
Si rezultat, shtatë inxhinierë të Departamentit të Punëve Publike (PWD), përfshirë dy inxhinierë kryesorë, janë pezulluar menjëherë. Gjithashtu, një hetim është hapur ndaj një inxhinieri të pensionuar. Për më tepër, kompania ndërtuese dhe konsulenti i dizajnit janë vendosur në listën e zezë për shkak të mangësive të dizajnit.
Dizajni i diskutueshëm i urës u mbrojt fillimisht nga inxhinierët, të cilët argumentuan se kthesa e mprehtë ishte e nevojshme për shkak të hapësirës së kufizuar pranë një stacioni metroje. Ata sugjeruan kufizimin e qarkullimit të automjeteve të rënda dhe vendosjen e kufijve të shpejtësisë për të parandaluar aksidentet.
Megjithatë, pas kritikave të publikut dhe shqetësimeve të ngritura, autoritetet vendosën të rishikojnë projektin.
Një komision është formuar për të shqyrtuar dhe implementuar përmirësime në dizajnin e urës. Kryeministri Yadav ka theksuar se ura do të hapet për përdorim vetëm pasi të realizohen këto përmirësime. /Katror.info
Përgatiti:
