Danielle Catton është një koleksioniste e kujtimeve të vogla të përditshmërisë si kartolina të ditëlindjeve, boarding pass-e, karta biznesi dhe objekte të tjera që për shumicën do të përfundonin në koshin e plehrave. Por për të, këto fragmente të vogla kanë një vlerë të veçantë, duke ruajtur histori dhe momente që meriton të mbijetojnë, edhe pse nuk kanë ndonjë qëllim praktik.
Këto fragmente të jetës së saj të përditshme qëndronin të mbledhura në një kuti plastike të madhe, derisa së fundmi hasi në një YouTuber që e prezantoi me praktikën e të quajturit ‘junk journaling’.
Junk journaling nënkupton marrjen e këtyre copëzave dhe ngjitjen e tyre në një faqe fletoreje. Një përzierje e lirë midis kolazhit, scrapbooking-ut dhe ditarit tradicional, kjo hobi kreative po përjeton një moment popullariteti, shkruan CNN, transmeton Katror.info.
Mundesh me e lexu edhe…
Kërkimet në Google për ‘junk journaling’ u rritën ndjeshëm në fund të dhjetorit dhe fillim të janarit, ndërkohë që shumë krijues në TikTok, Instagram dhe YouTube po ndajnë proceset e tyre krijuese dhe këshilla për këtë hobi me ndjekësit e tyre.
Ndërsa ‘scrapbooking-u’ mund të përfshijë blerjen e kompletëve me sticker-a dhe letra të zbukuruara për të dokumentuar një rast të veçantë, ‘junk journaling’ thekson përdorimin e materialeve të gjetura dhe të ricikluara: një sticker nga një frut, një broshurë e marrë në një muze, një paketim produkti që duket shumë i bukur për t’u hedhur.
Disa ndjekin filozofinë e përdorimit ekskluziv të ‘mbeturinave’, ndërsa të tjerë preferojnë t’u shtojnë këtyre materialeve të ricikluara fotografi të printuara dhe zbukurime të tjera dekorative.
Për disa, junk journaling shndërrohet në një ditar vizual, ku në margjina shkruhen mendime dhe shënime personale.
Megjithatë, për të tjerë, ai është thjesht një përzierje spontane materialesh të organizuara në faqe pa ndonjë rregull të caktuar.
Një nga gjërat më të bukura të kësaj praktike është mungesa e rregullave
Catton, 37 vjeç, sapo ka filluar të merret me ‘junk journaling’ disa javë më parë, por thotë se tashmë është bërë e varur nga kjo praktikë. Për më tepër, ajo i jep një arsye për të ripërdorur gjërat që ka nëpër shtëpi.
“Gjërat që zakonisht do të përfundonin në kosh tani po gjejnë një jetë të re brenda një ditari, diçka që mund ta shikoj pas disa vitesh,” thotë ajo.
Junk journaling ndihmon njerëzit të çlirojnë stresin
Edhe pse kjo praktikë është bërë kohët e fundit më e njohur, variacione të saj kanë ekzistuar prej një kohe të gjatë.
Blogerja e artizanateve, Jennifer Perkins, thotë se ka mbi një dekadë që merret me junk journaling, përpara se ta kuptonte se ekzistonte një term për atë që bënte.
Ajo e konsideron këtë hobi si një version të ‘zinemaking’, një medium DIY i vetë-publikuar me të cilin ishte marrë si adoleshente në vitet ‘90 (dhe që po përjeton gjithashtu një rigjallërim).
Perkins, 50 vjeç, gjithashtu e lidh këtë formë me ditarët mixed-media, siç ishte projekti i suksesshëm i Keri Smith-it “Wreck This Journal” i vitit 2007, që i inkurajonte përdoruesit të shfrenonin krijimtarinë e tyre duke mbushur dhe dëmtuar faqet e tij, si dhe Smash Books të K&Company, që i nxisnin përdoruesit të ngjisnin ose ngjitnin gjëra nga përditshmëria e tyre.
Junk journaling është një kanal krijues për Perkins , një mënyrë për t’u çlodhur dhe për të shndërruar energjinë e saj në krijimin e diçkaje të këndshme.
Ajo ka një qasje të pa strukturuar, duke lejuar veten të udhëhiqet nga ndjenja. Në një nga faqet e saj, ajo ngjiti një detyrë matematike nga viti 1982, duke e vendosur përballë një imazhi të një gruaje me dy gërsheta të zeza. Në një tjetër, ajo shpërndau prerje nga albumet e vitit të kaluar. Një faqe tjetër është tërësisht e përbërë nga copa që janë ngjyrë portokalli.
“Nëse kam nevojë për pak qetësi, marr një nga librat e mi dhe një grumbull me gjëra të rastësishme dhe i shqyej e thjeshtë i ngjis”, thotë ajo.
E detyron të vlerësosh gjërat e vogla
Ky trend është gjithashtu një pasqyrim i një fenomeni tjetër të kohëve të fundit: një kthim drejt analogut.
Në një kohë kur fotot, biletat e kinemasë dhe mesazhet jetojnë në re, ‘junk journaling’ krijon një rekord fizik të përvojave.
Për Tatyiana Gordon, 26 vjeç, kjo praktikë e ka ndihmuar të vlerësojë momentet e vogla të përditshmërisë dhe të shohë bukurinë edhe në gjërat e zakonshme.
Për shembull, së fundmi dokumentoi një mëngjes të kaluar me partnerin e saj në një kafene lokale, duke përfshirë një kartëvizitë, një copë të gotës së kafesë dhe faturën e porosisë së saj në një faqe të ditarit.
“Ishte një moment i vogël brenda një jave, por kishte diçka shumë të veçantë në të provuarit e diçkaje të re dhe ta ndanim atë bashkë,” thotë ajo.
Ajo tha se ky moment, sado i vogël, tani ka fituar një peshë të veçantë, pasi është shndërruar në një kujtim të përjetshëm të ruajtur në faqet e ditarit të saj. /Katror.info
Përgatiti:
