Në një konferencë interaktive të organizuar nga Këshilli i Evropës në bashkëpunim me Akademinë e Drejtësisë, u trajtua një nga çështjet më sfiduese për lirinë e medias në rajon: paditë strategjike kundër pjesëmarrjes publike (SLAPP) dhe roli i gjyqësorit në mbrojtjen e të drejtës për shprehje të lirë, shkruan Katror.info.
Ngjarja mblodhi gjyqtarë, prokurorë, përfaqësues të policisë, gazetarë dhe aktivistë të shoqërisë civile, të cilët diskutuan mënyrat konkrete se si sistemi i drejtësisë mund të mbrojë më mirë gazetarët dhe të ndalojë abuzimin me ligjin për të heshtur zërat kritikë.
Në fokus të diskutimeve ishin temat: “Si mund të veprojnë gjykatat si mbrojtëse të shprehjes së lirë,” dëshmitë e gazetarëve që përballen me kërcënime fizike dhe online, si dhe mjetet ligjore në dispozicion për të kundërshtuar dhe parandaluar SLAPP-et.
Mundesh me e lexu edhe…
Gjatë konferencës u prezantua edhe fushata “#GazetarëtKanëRëndësi” e Këshillit të Evropës, e cila thekson domosdoshmërinë e mbrojtjeve konkrete për gazetarët dhe krijimin e një ambienti të sigurt për punën e tyre.
Organizatorët theksuan se kjo konferencë është një hap i rëndësishëm drejt krijimit të një platforme të qëndrueshme për trajtimin e sfidave që lidhen me lirinë e medias dhe mbrojtjen e gazetarëve në rajon./Katror.info
