Këshilla thelbësore për ta përballuar një valë të të nxehtit.
Një valë e rrezikshme e të nxehtit po mbulon një pjesë të Shteteve të Bashkuara këtë javë, duke çuar temperaturat në shifra mbi 30 dhe duke ndikuar në pothuajse njëqind milionë amerikanë. Megjithatë, edhe në vendin tonë po mbretërojnë temperatura të ngjashme.
Ndërsa shumë njerëz kanë dëgjuar për rrezikun e goditjes nga i nxehti, ekspertët thonë se nxehtësia ekstreme mund të ndikojë pothuajse në çdo pjesë të trupit tuaj.
Mundesh me e lexu edhe...
Ja çfarë duhet të dini dhe si të qëndroni të sigurt, shkruan New York Times.
- Kujdes nga mjegullimi i trurit
Nxehtësia mund ta ngadalësojë trurin, duke ulur kohën e reagimit, vëmendjen dhe kujtesën, tha Dr. Neha Raukar, një mjeke e mjekësisë emergjente në Mayo Clinic. Kjo mund të nënkuptojë performancë më të dobët në testime, si dhe vështirësi në përqendrim dhe produktivitet në punë. Nxehtësia madje mund t’i bëjë njerëzit më të irrituar dhe agresivë; studiuesit kanë vërejtur se më shumë incidente zemërimi në rrugë dhe krime të dhunshme ndodhin kur rriten temperaturat.
Edhe pse arsyet nuk janë plotësisht të qarta, ekspertët besojnë se truri juaj mund të përqendrohet më shumë te qëndrimi i freskët sesa te të menduarit qartë.
- Bëni një plan për të qëndruar të freskët
Përballja me të nxehtin mund të jetë një sfidë që zgjat gjithë ditën. Nëse nuk keni kondicioner, është e mençur të ndërmerrni hapa si mbyllja e perdes, zhytja e këmbëve në ujë të ftohtë dhe mbështjellja e një peshqiri të lagur me akull të grimcuar rreth qafës, tha Kristie Ebi, një epidemiologe e klimës në Universitetin e Washingtonit. Ventilatorët mund të jenë gjithashtu të dobishëm, por sigurohuni që t’i lini dritaret hapur që të mos e ktheni shtëpinë tuaj në një furrë konveksioni, shtoi ajo.
Nëse keni nevojë të dilni jashtë, merrni parasysh ta mbani me vete një çadër, një shishe uji me akull dhe një shishe me spërkatës, të cilën mund ta përdorni për ta njomur lëkurën me ujë.
Marrja e pushimeve të rregullta në ambiente të brendshme mund të ndihmojë gjithashtu në parandalimin e sëmundjeve të lidhura me nxehtësinë, prandaj Dr. Raukar rekomandon të gjeni vende të freskëta aty pranë si qendrat tregtare, muzetë, bibliotekat dhe kafenetë.
- Mbani fëmijët dhe të moshuarit të sigurt
Të rriturit e moshuar janë veçanërisht të ndjeshëm ndaj nxehtësisë ekstreme sepse plakja dhe sëmundje si ato kardiovaskulare dhe diabeti ndikojnë në aftësinë e njerëzve për ta rregulluar temperaturën.
Nxehtësia mund t’i përkeqësojë këto gjendje. Sipas studimeve në The Lancet Planetary Health, nxehtësia është lidhur me një rritje të rrezikut për arrest kardiak, sulme në zemër dhe goditje në tru, si dhe me ulje të funksionit të veshkave.
Fëmijët janë në rrezik të lartë sepse priren të mbinxehen shpejt dhe e kanë më të vështirë të ftohen, tha Dr. Ebi.
- Zbuloni nëse barnat tuaja e rrisin rrezikun
Miliona njerëz marrin barna që i bëjnë më të ndjeshëm ndaj efekteve të nxehtësisë ekstreme. Ilaçet për sëmundje të zakonshme – përfshirë alergjitë, tensionin e lartë të gjakut, sëmundjet e veshkave, hipotiroidizmin dhe sëmundje të ndryshme mendore – mund ta dëmtojnë aftësinë e trupit për t’u ftohur.
Disa barna, si diuretikët dhe disa antidepresivë, mund ta shtypin ndjenjën e etjes dhe të shkaktojnë urinim dhe djersitje më të shpeshtë. Barna të tjera, si Benadryl dhe stimuluesit, mund të bëjnë që të djersitni më pak dhe që truri të rrisë temperaturën e trupit.
Por nuk duhet të lini pa i marrë dozat e barnave të përshkruara pa folur më parë me mjekun tuaj, tha Dr. Raukar. Në vend të kësaj, ajo rekomandon të merrni më shumë masa paraprake për të qëndruar të freskët.
- “Hajeni” ujin
Uji, qumështi dhe uji i kokosit janë disa nga opsionet më të mira për të qëndruar të hidratuar. Por trupi juaj e merr rreth 20% të ujit nga ushqimi.
Frutat dhe perimet e papërpunuara, përfshirë kastravecat, marulen, selinon, domatet, luleshtrydhet dhe pjeprin, janë ndër ushqimet më hidratuese. Dhe meqë ekspertët sugjerojnë ta shmangni përdorimin e sobës dhe furrës gjatë valëve të të nxehtit, përgatitja e sallatave, supave të ftohta dhe recetave të tjera që nuk kërkojnë gatim mund t’ju ndihmojë ta “hani” ujin.
Vetëm sigurohuni ta shmangni alkoolin dhe ta kufizoni kafen, sepse të dyja dehidratojnë, tha Dr. Raukar.
- Përshtatni rutinën tuaj të ushtrimeve
Ushtrimet fizike gjatë një vale nxehtësie mund të jenë të rrezikshme. Lagështia mund ta bëjë veçanërisht të vështirë rregullimin e temperaturës së trupit, sepse djersa nuk avullon lehtësisht nga lëkura dhe nuk ju ftoh me efikasitet. Ndërkohë, nxehtësia e thatë mund t’ju dehidratojë shpejt, duke ngadalësuar prodhimin e djersës.
Ekspertët thonë se nuk është e nevojshme që të gjitha ushtrimet tuaja t’i bëni brenda. Por duhet të hidratoheni para se të dilni jashtë; të vishni rroba që marrin frymë dhe me ngjyrë të çelët; dhe të gjeni vende me hije për të ushtruar. “Dëgjoni trupin tuaj”, tha Dr. Raukar, sepse nxehtësia ekstreme mund të shkaktojë ngërçe në muskuj dhe madje edhe shkatërrim të tyre.
Gjithashtu, mendoni për kohën e ditës kur ushtroni: Ndërsa herët në mëngjes mund të jetë koha më e mirë për nxehtësinë e thatë, ajo mund të jetë koha më e keqe për të ushtruar kur ka lagështi.
- Ftohuni përpara se të shtriheni
Temperatura është një nga faktorët më të rëndësishëm për të pasur një gjumë të mirë natën, dhe ekspertët rekomandojnë ta mbani dhomën e gjumit në 65 deri 68 gradë Fahrenheit (18-20 gradë Celsius). Nxehtësia ekstreme mund ta bëjë më të vështirë jo vetëm të flini, por edhe të qëndroni në gjumë, duke ju lënë të përgjumur në mëngjes.
Ndërsa kondicionerët dhe ventilatorët mund të ndihmojnë sigurisht, mund të qëndroni të freskët gjithashtu duke bërë një dush të ftohtë, duke spërkatur çarçafët me ujë të ftohtë ose duke vendosur jastëkun në ngrirje përpara gjumit./EO/Katror.info
