Nga 1 janari i këtij viti hyri në fuqi Rregullorja e KPM-së për mbrojtjen e përdoruesve në fushën e ofrimit të shërbimeve mediale audio dhe audiovizuele.
Kjo rregullore e miratuar nga KPM, mbron përdoruesit nga reklamat mashtruese dhe u ofron qytetarëve mundësinë e ndërprerjes së kontratës apo kthimit të mjeteve në rast se kushtet e kontratës shkelen njëanshëm.
Komisoni i Pavarur i Mediave, në një përgjigje për Katror.info bëri të ditur që kjo rregullore është në zbatim nga 1 janari 2025.
Mundesh me e lexu edhe…
”Rregullorja për mbrojtjen e përdoruesve në fushën e ofrimit të shërbimeve audio dhe audiovizuele është në zbatim nga 1 janari 2025, ashtu siç ëshë përcaktuar në Nenin 17 të kësaj Rregulloreje” u tha në përgjigjen e KPM-së.
Jeton Mehmetit nga KPM, tregoi se kjo rregullore erdhi si shkas i numrit të madh të ankesave që kanë bërë qytetarët ndaj disa operatorëve kabllorë.
Qëllimet kryesore të rregullores përfshijnë: mbrojtjen e përdoruesve, promovimin e konkurrencës së drejtë, garantimin e cilësisë së lartë të fotografisë dhe zërit, si dhe ofrimin e informacionit të qartë, të detajuar dhe transparent në lidhje me shërbimet e ofruara.
Për të siguruar transparencë dhe mbrojtjen e interesave të përdoruesve, çdo kontratë ndërmjet operatorit dhe përdoruesit duhet të përmbushë standardet e mëposhtme: ajo duhet të përfshijë kohëzgjatjen e saj, koston e pakos, pajisjeve, instalimit dhe çdo tarife shtesë për shërbime të veçanta.
Kontrata duhet të përmbajë gjithashtu listën e kanaleve në dispozicion gjatë periudhës së saj, si dhe datat e skadimit të kanaleve specifike për shkak të të drejtave të transmetimit, veçanërisht për ligat sportive kur këto të drejta përfundojnë para përfundimit të kontratës.
Një element i rëndësishëm i kontratës është përfshirja e një manuali për fshirjen, zhvendosjen ose kodimin e kanaleve.
Komisioni i Pavarur i Mediave thekson se përdoruesit duhet të informohen 30 ditë më herët për çdo ndryshim në kushtet e kontratës dhe, brenda këtij afati, mund të pranojnë ndryshimin ose të kërkojnë ndërprerjen e kontratës.
Në rast të ndërprerjes së kontratës, përdoruesit paguajnë vetëm për shërbimin e shfrytëzuar dhe kanë të drejtë të kërkojnë kompensimin e mjeteve të parapaguara për pjesën e pashfrytëzuar të kontratës. Gjithashtu, në rast të ndërprerjes së shërbimit për mbi 12 orë, përdoruesit kompensohen me 24 orë shërbim shtesë. Për kontratat 12-mujore, ndërprerja pa arsye nuk mund të bëhet pas 9 muajsh.
Në rast të ndryshimit të lokacionit të banimit, kur operatori nuk mund të ofrojë shërbim në lokacionin e ri, përdoruesit mund ta shkëpusin kontratën pa penalitete, ndërsa operatori nuk mund të kërkojë kompensim shtesë për shkëputje të parakohshme.
Përdoruesit kanë të drejtë të parashtrojnë ankesat e tyre fillimisht tek operatorët për zgjidhje, ndërsa operatorët janë të obliguar t’i trajtojnë pretendimet brenda 7 ditësh.
Në rastet kur operatorët nuk arrijnë të zgjidhin ankesat, përdoruesit mund t’i drejtohen KPM-së, e cila mund të ndërhyjë ose të vendosë masa ndëshkuese ndaj operatorëve që nuk përmbushin detyrimet e tyre.
Për ankesat që kanë të bëjnë me ndërprerje të shërbimeve, zgjidhja duhet të bëhet brenda 3 ditëve nga paraqitja e tyre. /Katror.info
Përgatiti:
