Ministria e Mbrojtjes e Kosovës ka bërë të ditur se e hëna (26 maj) deri më 9 qershor 2025, Kosova do të jetë nikoqire e “Defender Europe 25”, një prej ushtrimeve më të mëdha ndërkombëtare ushtarake të organizuar nga Ushtria e Shteteve të Bashkuara të Amerikës për Evropë dhe Afrikë, raporton Katror.info.
Gjatë kësaj periudhe, qytetarët do të vërejnë lëvizje të konvojeve ushtarake nga vendbazimet e Forcës së Sigurisë së Kosovës (FSK) drejt Aeroportit të Gjakovës dhe poligonit ushtarak në Babaj të Bokës.
Këto lëvizje janë pjesë e logjistikës dhe përgatitjeve për ushtrimin “Defender Europe 25”, dhe Ministria kërkon mirëkuptimin e qytetarëve për çdo shqetësim të mundshëm gjatë kësaj kohe.
Mundesh me e lexu edhe…
Ky ushtrim synon të demonstrojë gatishmërinë operacionale të FSK-së dhe ndërveprimin e saj me forcat partnere, përfshirë SHBA-të, Shqipërinë, Kroacinë, Maqedoninë e Veriut dhe Bullgarinë.
Pjesëmarrja në këtë ushtrim ndërkombëtar është një konfirmim i rëndësisë strategjike të Kosovës në sigurinë rajonale dhe euroatlantike./Katror.info
