Kampionia olimpike e Kosovës, xhudistja Nora Gjakova, ka shënuar një tjetër arritje të rëndësishme në karrierën e saj – këtë herë jashtë tatamit. Ajo është zgjedhur zyrtarisht anëtare e Komisionit të Sportistëve të Federatës Ndërkombëtare të Xhudos (IJF), duke u bërë pjesë e një forumi vendimmarrës që përfaqëson interesat e sportistëve në arenën ndërkombëtare të xhudos, shkruan Katror.info.
Lajmi është bërë i ditur nga Federata e Xhudos së Kosovës, e cila shprehu krenarinë për përfaqësimin e vendit në një rol kaq të rëndësishëm në strukturat ndërkombëtare sportive.
”Pas një karriere të shkëlqyer si Kampione Olimpike, medaliste botërore dhe kampione evropiane, Nora tani do të japë kontributin e saj edhe jashtë tatamit, në një rol vendimtar për të ardhmen e sportit të xhudos.
”, thuhet në njoftimin e federatës.
Mundesh me e lexu edhe...
Zgjedhja e saj në këtë komision është një vlerësim i drejtpërdrejtë i përvojës, integritetit dhe përkushtimit që ajo ka treguar ndër vite si sportiste. IJF, sipas këtij njoftimi, e cilëson Norën si një përfaqësuese të jashtëzakonshme për xhudistët në mbarë botën, falë perspektivës së saj të vlefshme dhe angazhimit për zhvillimin e mëtejshëm të këtij sporti.
“Urime, Nora! Ti jo vetëm që ke ngritur flamurin e Kosovës në arenat më të mëdha, por tani po ndihmon edhe në formësimin e të ardhmes së xhudos për brezat që vijnë,” përfundon njoftimi.
Ky hap i ri në rrugëtimin e Nora Gjakovës dëshmon se lidershipi i saj nuk kufizohet vetëm në fushën e garës, por shtrihet edhe në mbrojtjen dhe avancimin e të drejtave të sportistëve në nivel global – një frymëzim i vërtetë për sportistët e rinj dhe një krenari e madhe për Kosovën. /Katror.info
Përgatiti:
