Ngjarjet ndërkombëtare sportive = rritje ekonomike e forcim i imazhit të Kosovës

Vitin e kaluar, Kosova u bë për herë të parë nikoqire e pesë ngjarjeve ndërkombëtare në basketboll, një moment historik për sportin vendor që pati një ndikim të konsiderueshëm edhe në ekonominë e vendit.

Këto gara jo vetëm që ngritën nivelin e konkurrencës dhe promovuan talentin vendas, por edhe forcuan imazhin e Kosovës në arenën sportive ndërkombëtare, gjithashtu këto ngjarje i sollën Kosovës edhe përfitime ekonomike.

Një raport i detajuar nga Federata e Basketbollit të Kosovës, tregon për ndikimin që kishin këto pesë ngjarje në vendin tonë.

Raporti pasqyron ndikimin e 112 ndeshjeve të zhvilluara, të ndjekura nga 8,654 shikues.

Ndikimi Sportiv

Sipas raportit të publikuar, theksohet se 73% e pjesëmarrësve vlerësuan cilësinë e garave si të lartë ose shumë të lartë. Po ashtu, 59% e ekipeve raportuan përmirësime në performancë, veçanërisht në bashkëpunim dhe kohezion. Infrastruktura u përmirësua, megjithatë raporti thekson se ka ende hapësirë për zhvillim.

Ndikimi Ekonomik

Sa i përket ndikimit ekonomik, raporti tregon se shpenzimet direkte arritën në 269,129.80 €, ndërsa ato indirekte ishin 150,741.26 €. Kontributi total në ekonomi ishte 419,871.06 €, me sektorët kryesorë të përfituar si turizmi, shërbimet dhe transporti.

Ndikimi Social

Ndërsa një ndikim ky event e arriti edhe në aspektin social, sipas raportit të publikuar nga FBK-së, 52% e pjesëmarrësve u motivuan për të marrë pjesë në aktivitete sportive. Pjesëmarrja e audiencës u dominua nga grupmoshat 18-34 vjeç, dhe u vërejt një rritje e ndjenjës së krenarisë kombëtare mes qytetarëve, vlerëson raporti.

Këto gara luajtën një rol kyç në avancimin e sportit në Kosovë, duke ofruar mundësi për zhvillimin e talenteve dhe përmirësimin e infrastrukturës.

Përveç ndikimit sportiv, ngjarjet ndihmuan në rritjen e përfitimeve ekonomike, duke stimuluar sektorët e turizmit dhe shërbimeve.

Po ashtu, ato kontribuan në forcimin e imazhit të Kosovës si një organizatore e besueshme dhe kompetente për të menaxhuar ngjarje ndërkombëtare. /Katror.info