Sonte fillon edicioni i 15-të i Festivalit të Komedisë “Mittrix Fest”, i cili do të mbahet në Teatrin “Muharrem Qena” në Mitrovicë, nga 15 deri më 19 shtator 2025.
Ky festival tashmë është bërë një traditë e çmuar kulturore në qytetin e Mitrovicës dhe një ngjarje e rëndësishme artistike për mbarë rajonin, duke sjellë në skenë trupa teatrore nga Kosova, Shqipëria, Maqedonia e Veriut, Mali i Zi dhe Presheva. Çdo edicion i tij dëshmon fuqinë e artit që bashkon, sjell energji të reja dhe ofron një hapësirë ku arti komik merr dimensionin e tij më të plotë.
Hapja solemne do të mbahet sonte, më 15 shtator, nga ora 20:00 dhe do të shënojë fillimin e pesë netëve të mbushura me shfaqje, takime kulturore dhe aktivitete shoqëruese. Me mbi 300 shikues çdo natë dhe mbi 150 të rinj që përfitojnë nga trajnimet artistike, Mittrix Fest është shndërruar në festivalin me shikueshmërinë dhe ndikimin më të madh në Kosovë dhe më gjerë./Katror.info
