Ka nisur sezoni i dytë i serisë së podcasteve nga She Solutions #spotlight, dhe ky sezon bazohet në parimin dhe konceptin se “Të drejtat e grave janë të drejtat e njeriut”, dhe gjatë bisedave me të ftuarit, gra dhe burra, në fokus do të jetë barazia gjinore, shikuar nga këndëvështrime të ndryshme, duke marrë për bazë edhe infrastrukturën ligjore, por edhe zbatimin në prakitikë.
E ftuara e parë e këtij edicioni është Luljeta Vuniqi, një nga zërat më të spikatur dhe të fuqishëm në promovimin dhe mbrojtjen e të drejtave të grave në Kosovë. Ajo ka shërbyer si ambasadore e Republikës së Kosovës në Hungari, duke përfaqësuar vendin me dinjitet në arenën ndërkombëtare. Përveç kësaj, ajo është themeluese dhe udhëheqëse e Qendrës Kosovare për Studime Gjinore (QKSGJ), që prej vitit 2004 ka filluar të ndërmarrë studime të bazuara në fakte dhe të dhëna statistikore për çështjet gjinore dhe për respektimin e të drejtave të grave në Kosovë. Këto hulumtime kanë qenë themelore për përmirësimin e njohurive dhe politikave në fushën e barazisë gjinore.
Për një periudhë të gjatë kohore Luljeta Vuniqi ka mbajtur pozicionin e menaxheres së programit për gratë, pakicat, rininë dhe të drejtat e njeriut në Fondacionin Kosovar për Shoqëri të Hapur (KFOS), pjesë e rrjetit të Fondacionit SOROS. Me formimin e saj si sociologe, Vuniqi ka mbikëqyrur dhe udhëhequr projekte të shumta hulumtuese të rëndësishme të cilat kanë mbështetur fuqizimin e grave në shoqërinë civile dhe në politikën e Kosovës.
Mundesh me e lexu edhe…
Përveç angazhimeve të saj institucionale, Luljeta është gjithashtu një nga themelueset e Rrjetit të Grupeve të Grave dhe Rrjetit të Organizatave të Grave Rome, Ashkali dhe Egjiptase, duke punuar për përfshirjen dhe mbështetjen e grave nga komunitetet më të margjinalizuara. Ajo është anëtare e bordit të disa organizatave vendore dhe ndërkombëtare, duke përfshirë Lobin Rajonal të Grave, një platformë e rëndësishme për promovimin e të drejtave të grave në rajon.
Puna e Luljeta Vuniqit për të drejtat e grave ka pasur një ndikim të gjerë, duke kontribuar në nismat për barazi dhe gjithëpërfshirje, jo vetëm në shoqërinë civile, por edhe në fushën e politikës, ku gratë vazhdojnë të kërkojnë një përfaqësim më të madh dhe më të fuqishëm.
Projekti i serisë së podasteve She Solutions #spotlight financohet nga The Sigrid Rausing Trust, ndërkaq mundësohet nga Rrjeti i Grave të Kosovës si dhe zbatohet nga OJQ – She Solutions.
Po ashtu, realizimi i videove për podcastet mundësohet nga Katror Media.
Përgatiti:
