Në Fakultetin e Filologjisë në Prishtinë ka filluar edicioni i sivjetshëm i Shkollës Verore të Bashkimit Evropian, e cila këtë vit i kushtohet sfidave dhe perspektivave ndërdisiplinore të përdorimit të inteligjencës artificiale (IA). Kjo ngjarje synon të nxisë diskutim të gjerë rreth ndikimit të IA-së në fusha të ndryshme të jetës dhe shoqërisë, shkruan Katror.info.
Rektori i Universitetit të Prishtinës, Arben Hajrullahu, gjatë fjalës së tij në hapje, e cilësoi këtë periudhë si fazën e pestë të zhvillimit teknologjik. Ai rikujtoi se pas revolucionit industrial, elektrifikimit, automatizimit dhe digjitalizimit, tash po përballemi me epokën e inteligjencës artificiale.
“Ndodhemi në një etapë të re ku asgjë nuk do të jetë më si më parë. Duhet të përgatitemi për ndryshimet që do të sjellë kjo teknologji,” theksoi rektori, duke shtuar se as ekspertët më të njohur të IA-së nuk mund të parashikojnë me saktësi se si do të duket e ardhmja.
Mundesh me e lexu edhe…
Në hapje foli edhe Johannes Stenbaek, shef i bashkëpunimit në Zyrën e BE-së në Kosovë, i cili vlerësoi potencialin transformues të inteligjencës artificiale, por theksoi rëndësinë që kjo teknologji të zhvillohet në shërbim të interesit publik.
Shkolla Verore organizohet nga Young Cell Scheme dhe European Youth Card Kosovo, në partneritet me Universitetin e Prishtinës. Për katër ditë me radhë, pjesëmarrësit do të angazhohen në diskutime për përdorimin e IA-së në arsim, media, ekonomi, etikë, privatësi, rregullim ligjor dhe siguri kibernetike./Katror.info
