Ministria e Sportit ka nisur konsultimet me federatat sportive për Strategjinë e Sportit të Kosovës për periudhën 2025-2030, e miratuar vitin e kaluar nga Qeveria e Kosovës.
Dokumenti përcakton katër objektiva strategjike dhe 13 objektiva specifike, duke synuar qeverisje të mirë, avancim të performancës sportive, krijimin e një shoqërie aktive e të shëndetshme dhe përdorimin e sportit si mjet diplomacie publike.
Zyrtari për komunikim me federata në MKRS, Fidan Shatri ka zbuluar qëllimet kryesore të kësaj strategjie.
Mundesh me e lexu edhe...
Shatri ka shtuar se kjo strategji e sheh sportin si rrugë për shëndet fizik, por edhe si mundësia më e mirë për fuqizimin e imazhit ndërkombëtar të Republikës së Kosovës.
“E para është qeverisja e mirë në sport dhe integriteti në sport, e cila shtjellon krijimin e një sistemi të qëndrueshëm financiar, transparencën demokratike përmes rritjes së kapaciteteve në institucionet sportive, në këtë rast federatat, klubet dhe të gjitha organizatat sportive. E dyta është avancimi i performancës së lartë në sport…E treta është shoqëria aktive dhe e shëndetshme përmes edukimit fizik, zhvillimi i një kulture dhe aktiviteti fizik nga fëmijët deri te të moshuarit…Dhe e katërta është sporti në shërbim të diplomacisë publike, pra me rregulloren dhe Ligjin e ri të Sportit parashihet mbështetje e veçantë për organizatat sportive, të cilat zhvillojnë aktivitete ndërkombëtare brenda vendit“, thekson Shatri në një intervistë për KosovaPress.
Strategjia përfshin edhe përgatitjet për Lojërat Mesdhetare 2030, investimet në infrastrukturën sportive dhe planin pesëvjeçar për stadiumet kryesore të vendit.
“I gjithë sistemi sportiv është i paraqitur në strategji. Nëse nuk kemi një strategji atëherë është problem edhe puna ad hoc të punohet. Janë të paraqitura të gjitha, unë mendoj që përdorimi i sportit për ta promovuar Kosovën me aktivitete ndërkombëtare, i kemi në fokus edhe Lojërat Mesdhetare 2030 dhe unë shpresoj shumë që përtej Lojërave Mesdhetare, infrastruktura sportive do të shërbejë për komunitetin e sportit në vendin tonë. Kështu që Lojërat Mesdhetare do të shërbejnë për një investim dhe mobilizim të të gjithë shtetit që për Lojërat Mesdhetare të jetë infrastruktura, por të jetë një infrastrukturë e qëndrueshme edhe pas Lojërave Mesdhetare”, tha Shatri.
Derisa flet për stadiumet, Shatri thotë se nuk ka lajme të reja sa i përket ndërtimit të stadiumit kombëtar.
Ai theksoi në fund se për çdo investim infrastrukturor, po mendohet në detaje edhe mënyra e mirëmbajtjes së tyre pasi edhe kjo çështje është një problematikë në vete. /Katror.info
