Administrata Amerikane e Ushqimit dhe Barnave (FDA) ka miratuar një lloj të ri antibiotiku për trajtimin e infeksioneve të traktit urinar. Tableta, e quajtur gepotidacin, do të shitet nën emrin tregtar Blujepa dhe pritet të jetë e disponueshme në gjysmën e dytë të vitit 2025.
Blujepa është miratuar për trajtimin e femrave mbi moshën 12 vjeç me infeksione të thjeshta të traktit urinar (UTI). Sipas kompanisë farmaceutike GSK, rreth gjysma e grave do të përjetojnë një UTI gjatë jetës së tyre, ndërsa rreth 30% do të kenë një infeksion që rikthehet pas trajtimit, shkruan CNN, transmeton Katror.info.
Infeksionet e përsëritura të traktit urinar janë bërë një problem gjithnjë e më i madh, pasi bakteret që i shkaktojnë ato janë bërë më rezistente ndaj antibiotikëve ekzistues.
Mundesh me e lexu edhe…
Blujepa është antibiotiku i parë oral i një lloji të ri për trajtimin e infeksioneve të traktit urinar (UTI) që merr miratim pas më shumë se 20 vitesh. Zhvillimi i tij u financua pjesërisht nga grante të Autoritetit të Përparuar të Kërkimeve dhe Zhvillimit Biomjekësor të qeverisë amerikane dhe Agjencisë për Reduktimin e Kërcënimeve të Mbrojtjes.
Dr. Tony Wood, drejtori shkencor i GSK, e cilësoi miratimin e Blujepa-s si një “moment kyç”.
“Jemi krenarë që kemi zhvilluar Blujepa-n, antibiotikun e parë në një klasë të re për trajtimin e infeksioneve të thjeshta të traktit urinar pas gati tre dekadash, duke sjellë një mundësi të re për pacientët, veçanërisht për ata që përballen me infeksione të përsëritura dhe rritjen e rezistencës ndaj trajtimeve ekzistuese,” thuhet në deklaratë.
Edhe antibiotikë të tjerë janë miratuar së fundmi për trajtimin e infeksioneve të traktit urinar (UTI), megjithëse ato i përkasin klasave ekzistuese të barnave. Pivya, një lloj peniciline, u miratua në prill 2024 për trajtimin e infeksioneve të thjeshta të traktit urinar, ndërsa Orlynvah u miratua në dhjetor 2024 për trajtimin e UTI-ve te gratë që kanë mundësi të kufizuara ose nuk kanë opsione të tjera trajtimi me antibiotikë.
Blujepa i përket një klase të re antibiotikësh, të quajtur triazaacenaphthylene, dhe është i pari i këtij lloji.
Sipas GSK, infeksionet e traktit urinar janë shkaku i rreth 8 milionë vizitave emergjente dhe 100,000 shtrimeve në spital çdo vit në SHBA. Gratë preken më shpesh se burrat.
Blujepa funksionon duke penguar veprimin e dy enzimave që bakteret kanë nevojë për t’u shumuar. Për shkak se mekanizmi i tij i veprimit është i synuar, ai mund të ulë mundësinë që bakteret të bëhen rezistente ndaj tij, tha Dr. Tony Wood të hënën gjatë një bisede me gazetarët.
Në provat klinike me më shumë se 3,000 gra dhe vajza adoleshente, ky ilaç – një tabletë që merret dy herë në ditë – dha rezultate të ngjashme ose më të mira se nitrofurantoina, antibiotiku kryesor që përdoret aktualisht për trajtimin e UTI-ve.
Efektet anësore kryesore ishin diarreja, e cila preku 16% të pacientëve në provën klinike, dhe nausea (të përzierat), që u raportua nga 9% e pjesëmarrësve. Shumica e këtyre efekteve ishin të lehta.
Simptomat e infeksioneve të traktit urinar përfshijnë urinim të shpeshtë me ndjesi djegieje ose dhimbjeje, gjak në urinë, dhimbje të lehta në pjesën e poshtme të barkut dhe nevojën për të urinuar edhe pasi sapo është kryer urinimi. /Katror.info
Përgatiti:
