Gjatë kësaj jave, në të gjithë territorin e Kosovës pritet mot i qëndrueshëm me temperatura të larta, sipas parashikimeve të fundit nga Instituti Hidrometeorologjik i Kosovës, raporton Katror.info.
Autoritetet meteorologjike bëjnë thirrje për kujdes të shtuar ndaj ekspozimit në diell, veçanërisht nga ora 10:00 deri në 17:00, për shkak të nivelit të lartë të rrezatimit UV.
Këshillohet që qytetarët, sidomos fëmijët, të moshuarit dhe ata me probleme shëndetësore kronike, të shmangin daljet gjatë këtyre orëve.
Mundesh me e lexu edhe…
Rekomandohet gjithashtu veshja me rroba të lehta dhe me ngjyra të çelëta, si dhe konsumimi i lëngjeve në sasi të mjaftueshme, sidomos ujë.
Parashikimi ditor për javën:
- E hënë: Moti do të jetë kryesisht me diell, me vranësira të lehta. Temperaturat minimale do të jenë mes 7 dhe 10°C, ndërsa ato maksimale do të shkojnë nga 25 deri në 29°C.
- E martë: Diell dhe vranësira të pjesshme. Maksimumet ditore do të arrijnë deri në 30°C.
- E mërkurë: Vazhdojnë kushte të ngjashme me të martën, me temperatura që mund të arrijnë deri në 31°C.
- E enjte: Moti mbetet i kthjellët me disa vranësira kalimtare. Temperaturat minimale do të lëvizin mes 9-12°C, ndërsa ato maksimale do të jenë nga 28 deri në 32°C.
- E premte: Parashikohet mot me diell dhe vranësira të shpërndara. Temperaturat e mëngjesit do të jenë mes 9 dhe 13°C, ndërsa ato të ditës mes 29 dhe 33°C.
