Project 195: Një iniciativë që synon të bashkojë artistët e gjithë botës përmes fuqisë së artit
Një lëvizje e re po kërkon të lidhë krijues nga çdo vend i botës, duke eksploruar idenë nëse arti mund të jetë “gjuha e vetme që na bashkon të gjithëve”.
Project 195, i krijuar nga platforma artistike 13AM Studio, nisi më 17 shkurt dhe do të zgjasë deri më 31 gusht. Deri më tani, artistë nga 71 vende janë bërë pjesë e tij, shkruan Positive News, transmeton Katror.info.
George Ripton, themeluesi i 13AM Studio, theksoi rëndësinë e projektit:
“Arti është mënyra më e pastër e lidhjes ai kapërcen kufijtë, kulturat dhe gjuhët pa kufizime. ‘195 në 195’ nuk është thjesht një numër, por një dëshmi se kreativiteti mund të na bashkojë në mënyra të pakrahasueshme.”
Mundesh me e lexu edhe...
Një hapësirë për çdo artist, çdo histori dhe çdo kulturë
Ripton thekson se çdo artist që bëhet pjesë e Project 195 sjell me vete një histori unike, një perspektivë dhe një pasqyrë të kulturës së tij.
Nga 195 shtetet e botës, artistë nga Evropa, Azia, Afrika dhe Amerika e Jugut tashmë janë regjistruar. Një nga emrat më të fundit që iu bashkua projektit është Pape Ink nga Panamaja. Stili i tij dinamik dhe i frymëzuar nga graffiti eksploron temën e rilidhjes me imagjinatën, lojën dhe lirinë krijuese, sipas Ripton.
Punimet e përfshira do të ekspozohen si online, ashtu edhe fizikisht, përmes ekspozitave dhe eventeve ndërkombëtare. Artistët mund të zgjedhin të dorëzojnë një vepër ekzistuese ose të krijojnë diçka të re, në mënyrë që të shmanget çdo presion i panevojshëm mbi ta.
“E kuptojmë që krijimi nga e para kërkon kohë, ndaj nuk duam të shtojmë ngarkesë të panevojshme,” tha Ripton.
“Deri më tani kemi pasur një përzierje veprash të reja dhe ekzistuese, dhe jemi të hapur për atë që funksionon më mirë për secilin artist”, shtoi ai.
Një dokumentar global në kohë reale
Më shumë se 200 artistë, përfshirë ilustrues, regjisorë, fotografë dhe dizajnerë, tashmë përdorin 13AM Studio për të prezantuar dhe shitur veprat e tyre.
Ripton ka nisur një seri përditësimesh të përditshme në rrjetet sociale të 13AM Studio, duke dokumentuar sfidat, momentet e suksesshme dhe historitë e panjohura të artistëve nga e gjithë bota. Ai e përshkruan këtë proces si një “dokumentar global që po realizohet në kohë reale”.
“Ky nuk është thjesht një numërim i vendeve pjesëmarrëse është një ndryshim në mënyrën se si e shohim botën artistike,” tha ai.
“Talenti është i shpërndarë në mbarë botën, por mundësitë nuk janë të barabarta. Kjo lëvizje ka për qëllim të thyejë barrierat dhe t’u japë çdo artisti, kudo, një vend në tryezë”, shtoi ai.
Një hap i mëtejshëm drejt diversitetit dhe përfaqësimit global
Pasi të arrijë objektivin fillestar, 13AM Studio synon ta çojë më tej Project 195, duke vënë në fokus artistët nga vendet e nënpërfaqësuara. Objektivi është krijimi i një platforme të përhershme për bashkëpunim, shkëmbim kulturor dhe mundësi artistike.
“Në një botë që shpesh duket e ndarë dhe e tensionuar, arti mbetet një nga forcat e pakta që mund të lidhë kulturat, të nxisë dialog dhe të krijojë ura mes njerëzve,” tha Ripton.
Për të ndjekur ecurinë e Project 195, mund të vizitoni faqen zyrtare të projektit ose ta ndiqni në Instagram: @13amstudio. /Katror.info
Përgatiti:
